Posibleng magpas-an og bug-at nga kalbaryo ang Brgy. Ginebra Gin Kings sa ilang pagpakigsangka og balik sa TNT Tropang Giga karong Biyernes sa alas 7:30 sa gabii, Marso 21, 2025, sa Game 4 sa Philippine Basketball Association (PBA) Season 49 Commissioner’s Cup finals series sa Ynares Center sa Antipolo City.
Kini gumikan kay kuwestiyunableng makaduwa ang resident import sa Gin Kings nga si Justin Brownlee tungod sa nasinati niining piang sa kumagko sa iyang tuo nga kamot sa Game 3 diin midaog ang Tropang Giga, 87-85, nga naghatag kanila og 2-1 nga bintaha sa best-of-seven series.
“Justin provides a lot of stuff for us, not just on offense, but on defense. A big part of our system revolves around Justin,” asoy ni Ginebra assistant coach Richard del Rosario kabahin sa haw-ang nga kinahanglan nilang tapakan kon dili makaduwa si Brownlee nga napatik sa www.pba.ph.
Alang sa Tropang Giga, kinahanglan nilang mangandam og insakto gumikan kay naa o wala si Brownlee, aduna gihapon igong ikabuga ang Gin Kings.
“Nakita niyo naman how strong that team is. Without Justin, somebody else is going to step up,” matod ni TNT coach Chot Reyes kabahin sa Game 3.
Nasinati ni Brownlee ang iyang angol sa tungatungang bahin sa 3rd quarter sa Game 3 apan taliwala niini, nakasugakod gihapon ang Gin Kings ug diriyot pa niining mailog ang daog.
“I told the players we’re going to see the best of Ginebra even without Justin, we have to be at our best,” dugang ni Reyes.
“ I reminded them how strong and deep that team is. And when they went up by three, we didn’t panic and that’s the turning point.”
Game 3 boxscores:
TNT (87) - Nambatac 24, Hollis-Jefferson 20, Oftana 16, Khobuntin 10, Pogoy 8, Erram 5, Aurin 4.
Ginebra (85) - Brownlee 19, Thompson 15, Rosario 13, Abarrientos 13, Malonzo 11, J.Aguilar 6, Holt 5, Ahanmisi 3. / Quarterscores: 17-17, 42-48, 72-66, 87-85. / ESL