Gimandoan ni Cebu Governor Gwendolyn Garcia ang Cebu Electric Cooperative II (Cebeco II) sa paghatag og prayoridad sa wa gihapon masulbad nga power interruptions nga nasinati sa Tabogon, amihanang Sugbo.
Ang brownout nga molanat usahay og tunga sa adlaw nakaapekto na sa mga negusyo ug mga lumolupyo, labina sa supply sa tubig nga nagsalig sa mga makina.
Sa ikaduhang tigom nga gipatawag ni Garcia tali sa Cebeco II, nga gitambungan usab ni Tabogon Mayor Francis Salimbangon sa Kapitolyo, nasayran nga ang sunodsunod nga power interruptions makabalda na sa mga gimbuhaton sa mga tawo sa lungsod kay moabot og tag lima ngadto na sa 12 ka oras ang pagkawala sa supply sa kuryente.
Lakip sa gisumbong ni Salimbangon nga gawas sa mga residente, apektado usab ang water distribution sa lugar tungod sa power outages.
Ilabi na nga sagad sa mga water pumping station sa lungsod nagsalig usab sa kuryente. Lakip sa grabeng naapektuhan ang mga barangay sa Lipjo, San Isidro, ug Taba-ao.
“Kon tubig ang ma-interrupt, pwerting paita,” matod ni Garcia atol sa tigom sa Nobiyembre 7, 2023, taho sa Sugbo News, social media platform sa Buhatan sa Gobernador.
Una na nga gipasabot sa Cebeco nga usa sa mga hinungdan sa power interruptions ang padayong maintenance nga gihimo sa National Grid Corporation of the Philippines (NGCP).
Ang Cebeco II nagserbisyo sa mga dakbayan sa Danao ug Bogo ug sa 11 ka mga munisipalidad sa probinsya sama sa Medellin, Daanbantayan, San Remigio, Tabogon, Borbon, Sogod, Tabuelan, Tuburan, Catmon, Carmen, ug Compostela.
Gikatakda nga mopatawag og laing tigom si Garcia sa Cebeco II sa Nobiyembre 15 aron masuta ang update sa sitwasyon sa lugar.
Gusto niya nga masuta kon nahimo ba sa electric company ang iyang gitahas.