Bucks, Clippers, Timberwolves, 2-0 ang tinguha
Pulos mosuway pagposte og 2-0 nga bintaha ang Milwaukee Bucks, Los Angeles Clippers ug Minnesota Timberwolves sa ilang pag-host og lainlaing kontra sa 1st round playoffs series sa National Basketball Association (NBA) ning Miyerkules, Abril 24, 2024 (PH time).
Ang Bucks makigbatok sa Indiana Pacers sa Eastern Conference samtang makigharong ang Clippers sa Dallas Mavericks unya makigkombati ang Timberwolves sa Phoenix Suns sa Western Conference.
Ang Bucks ug Clippers parehong ningdaog sa Game 1 bisan wala ang usa sa ilang labing lig-ong mga haligi.
Si Bucks forward Giannis Antetokounmpo dili gihapon makaduwa ning higayuna tungod kay nagpaalim pa kini sa iyang angol (strained left calf) ug mao sab si Clippers forward Leonard (repaired right knee). / AP