Naglaum ang mga sakop sa Konseho sa Dakbayan sa Sugbo nga mahuman ang mga pagdungog sa 2025 annual budget karong Nobiyembre.
Si Konsehal Noel Wenceslao, chair sa finance committee, niingon sa text message sa SunStar Cebu niadtong Sabado, Oktubre 12, 2024, nga ang City Treasurer’s Office unang tawgon aron depensahan ang mga tinubdan sa pundo atol sa budget hearing nga gipaabot nga magsugod karong bulana.
Si Mayor Raymond Alvin Garcia, sa sayo pa, niingon nga iyang gilantaw ang tinuig nga budget nga mokabat sa P18 ngadto sa P20 bilyunes alang sa sunod tuig.
Siya niingon kaniadto nga human sila nakigtagbo sa mga department head niadtong Septiyembre 30, andam na ang budget proposal nga isumiter ngadto sa City Council sa dili pa ang Oktubre 15 human niya kini mapirmahan.
Matod ni Garcia, sa paghimo sa proposed budget, iyang gikonsiderar ang kita ug gasto sa lokal nga kagamhanan.
Ang Opisina sa Mayor nag-andam sa tinuig nga badyet ug nagsumiter niini ngadto sa Sangguniang Panlungsod nga maoy nagpahigayon og sunodsunod nga mga pagdungog sa dili pa mapasar ang sugyot.
Ang mga pagdungog sa badyet kinahanglan nga mahibal-an ang mga sugyot gikan sa matag usa sa 27 nga mga departamento ug opisina, ug dayon ang konseho aprobahan kini nga adunay mga pagputol o wala.
Ang budget sa kasamtangang tuig nga niabot og P25,833,177,745.20, giaprubahan sa konseho niadtong Disyembre 27, 2023.
Sa miaging taho, si Garcia niingon nga plano niya nga unahon ang pagkompleto sa Cebu City Medical Center sa nahabilin nga termino ni dismissed mayor Michael Rama.
Matod niya, 10 na ka tuig nga dili maayo ang kahimtang sa ospital nga nahunong ang konstruksyon sulod sa duha hangtod tulo ka tuig.
Tumong niya nga mahuman dayon ang nahabilin nga mga andana aron makadugang ang City Government og dugang serbisyo.
Sa pagkakaron, ang unang tulo ka andana ug ang ikapitong andana ra, ang gigamit.
Nagplano usab si Garcia nga ipadayon ang pipila ka mga proyekto ni Rama, apil na ang pagtukod og medium-rise nga mga edipisyo.
Gidugang niya nga kini nga paningkamot nahisubay sa 4PH program sa nasudnong kagamhanan, Pambansang Pabahay Para sa Pilipino, nga gitumong sa paghatag og kapuy-an sa mga Pilipino. / JPS