Budget sa Cebu City

File photo
File photo

Napasar na sa sisyon sa Konseho sa Dakbayan sa Sugbo niadtong Miyerkules, Disyembre 20, 2023, ang P22 bilyunes nga budget alang sa 2024.

Apan nagpadayon ang init nga isyo tungod sa pagkuwestiyon ni Mayor Michael Rama, kinsa nagduso sa P100 bilyunes nga budget.

Subay sa proseso, ang napasar sa Konseho nga P22 bilyunes budget mobalik sa buhatan sa mayor alang sa paglagda aron mahimong hingpit nga balaod.

Apan base sa iyang pagkuwestiyon, lagdaan kaha niya kini? Dako-dako ang nakibhang, dili mominos sa 78 porsiyento gikan sa iyang orihinal nga sugyot.

Ug ang sisyon sa Konseho niadtong Miyerkules maoy ilang katapusang regular session ning tuiga. Unsay mahitabo kon dili malagdaan ni Rama?

Matod ni Konsehal Jocelyn Pesquera, nga nahinabi sa SunStar Cebu online commentary ‘Beyond The Headlines’ sa Biyernes, Disyem­bre 22, 2023, ang budget ning tuiga nga P50 bilyunes maoy magpadayon hangtod nga ma­kaumol sa laing budget.

Nganong gikunhoran ang budget samtang ang projected income sa sunod tuig naa sa P100 bilyunes?

Si Pesquera nipasabot sa duha ka bug-at nga puntos. Una, kapin lang sa P7 bilyunes ang ilang nakolekta ning tuiga alang unta sa budget nga P50 bilyunes.

Ikaduha, ang dakong tinubdan sa projected budget sa sunod tuig mao ang tax revenues nga mokabat og P77 bilyunes.

Apan ang balaudnon sa pag-update sa Property Tax (RPT) sa Dakbayan wala pa mapasar. Mako­lekta kaha kini? Dakong porsiyento nga dili ma­kab-ot ang P100 bilyunes nga sugyot nga budget.

Busa mas nauyonan sa Konseho ang P20 bil­yunes nga mas duol sa kamatuoran subay sa projected income sa sunod tuig.

Si Pesquera nagkanayon nga ang pagdumala sa budget sa Dakbayan susama sa pag-atiman sa budget sa pamilya. Matod niya, magbase sa tino nga kita, dili sa kita nga naglutaw pa sa hangin.

Hinuon, gipasabot niya nga kon dunay dakong buhis nga makolekta ang Siyudad, pwede pun-an pinaagi sa pagpalabang og supplemental budget.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph