Giklaro sa hepe sa Department of Social Welfare and Development (DSWS) sa Dakbayan sa Sugbo nga ilang pundo ang gipamalit sa mga nakontrobersiyal nga bugas nga gipang-apud-apod sa kabarangayan.
Si Portia Basmayor nitug-an sa SunStar Cebu niadtong Huwebes, Marso 20, 2025, nga ang gipanghatag nga bugas sa Barangay Duljo Fatima niadtong Marso 11, kabahin sa ilang naandan nga food pack distribution program alang sa mga indigent population.
Iyang gipasabot nga ang gipang-apudapod nga bugas, dili gikan sa calamity funds.
Ang pagpasabot maoy tubag sa pasangil sa mga konsehal nga gigamit ni Mayor Raymond Alvin Garcia ug sa iyang partido, Kugi Uswag Sugbo (Kusug), ang gipamalit nga bugas alang sa mga biktima sa kalamidad sa ilang pagpangampanya.
Sila si Konsehal Jocelyn Pesquera ug Mary Ann de los Santos niisa ning maong isyu atol sa regular session sa Miyerkules, Marso 19, ug namasangil nga ang mga sinakong bugas nga gipamalit gamit ang calamity funds, gipang-apudapod sa Barangay Duljo-Fatima ug Basak Pardo nga wala gideklarar nga ubos sa state of calamity.
Ilang gikwestyon kon gigamit ba sa kampo ni Garcia ang pundo sa gobiyerno aron makapabor sa kampanya.
Niadtong Nobiyembre 2024, ang kagamhanan sa Dakbayan sa Sugbo namalit og 166,600 ka sakong bugas gikan sa A1 Milling Corporation kantidad og P49 milyunes gikan sa Local Disaster Risk Reduction and Management (LDRRM) relief and recovery budget, matod nila ni De los Santos ug Pesquera.
Gitataw ni Basmayor nga ang DSWS dunay iyang budget alang sa indigent programs.
Iya usab nga gidepensahan ang paggamit sa LDRRM relief and recovery budget alang sa social preparedness, pagtabang sa mga indigent bisan way gideklarar nga kalamidad.
“Sa local disaster pero dili siya pang-calamity budget kay naa man tay social preparedness nga budget,” matod ni Basmayor.
Sa buwag nga interview, si De los Santos nitug-an sa SunStar Cebu nga ang pag-apudapod sa tag lima ka kilo nga bugas humay gihimo samtang nagsingabot ang kampanya ug makapaduda nga gisagulan og pamolitika.
Iya usab nga gisaway ang pamaagi sa pagdiskarga sa bugas nga murag mga balas ug graba nga gipanghulog lang sa truck sa Brgy. Duljo Fatima.
Matod ni De los Santos nga dunay video clips nga si Garcia makita nga didto atol sa pagpang-apudapod sa bugas ug ang mga tawo nga nalambigit sa pagpanghatag nagsul-ob og “Kusog” t-shirts.
Iyang gidugang nga way mga DSWS personnel nga mao unta ang lead agency sa paghimo og relief operation sa Cebu City ug ang didto mga kawani sa Department of General Services (DGS) ug mga individual nga nagsul-ob og political campaign shirts.
Samtang si Pesquera nitug-an sab nga ang P49,980,00 gigahin aron sa pagpamalit sa sinakong bugas gikan sa relief and recovery account. / EHP