Dili na angayan nga kan-on sa tawo ang 397 ka sako sa bugas gikan sa programa sa Sugbo Merkado Barato (SMB) human kini giinspeksyon sa mga buhatan sa Kagamhanan sa Dakbayan sa Mandaue.
Matod ni City Administrator Gonzalo “Sally” Malig-on sa usa ka interbyu niadtong Huwebes, Agusto 7, 2025, nga sa random inspection sa City Agriculture Office ug City Health Office, ang bugas nakita nga dili na angayan kan-on.
“According to the initial test, they recommended that the rice is not fit for human consumption,” nagkanayon si Malig-on.
Nagpadayon pa ang dugang pag-analisa sa tabang sa regional office sa Department of Agriculture.
Apan matod ni Malig-on, base sa unang resulta sa city level, ang duha ka buhatan wala na morekomendar nga ipang-apudapod ang bugas sa publiko.
Matod niya nga ang mga sako nga naablihan na adunay mga timailhan sa physical contamination. Gidugang niya nga ang mga sako nga wala pa maablihi gipaubos pa sa dugang nga pagsulay sa mga ahensiya nga eksperto niini.
Gimanduan na ni Mayor Thadeo “Jonkie” Ouano nga dili na ibaligya o ihatag ang bugas sa mga kabos nga pamilya.
Gipasabot ni Malig-on nga ang siyudad kinahanglan nga mag-amping ug dili magpameligro sa kinabuhi sa mga tawo.
Hinuon, nangita na ang siyudad og alternatibong pamaagi sa paglabay sa bugas nga dili na kini makonsumo sa tawo.
Apan, ang legal nga kawalay-kasiguroan karon maoy nakababag sa sunod nga mga lakang sa siyudad kay ang mga opisyal naningkamot pa sa pagtino kon duna bay Memorandum of Agreement (MOA) nga gipirmahan sa Kagamhanan sa Probinsiya sa Sugbo kalabot sa alokasyon sa bugas.
“We don’t even know if a MOA exists. Without that document, we don’t know how to proceed whether to return the stocks or pay for them,”sumala ni Malig-on.
Naningkamot pa sab ang siyudad sa pagtino kon si kinsa ang responsable sa maong sitwasyon labina kay nahitabo kini sa miaging administrasyon.
“This happened during the previous administration, so we still don’t know who was directly responsible. For now, CSWS is the only office we can initially pinpoint,” matod niya.
Wala pa mahibalo si Malig-on kon pila ang kantidad sa 397 ka sako sa bugas nga nadaot nga kabahin sa kapin sa 1,000 ka sako nga nadawat sa siyudad gikan sa probinsiya ubos sa SMB nga programa.
Gibutyag sab ni Malig-on nga nasagmuyo si Mayor Ouano sa dihang nasayod siya sa sitwasyon labina kay daghang tawo ang nanginahanglan ug ang bugas unta makatabang kon wala pa kini nadaot. /