Buhatan sa pabuto miulbo; 4 namatay

Buhatan sa pabuto miulbo; 4 namatay
SunStar Local News GPX

Pagbuto sa usa ka matang sa pyrotechnics maoy gidudahang hinungdan sa pag-ulbo ug pagkasunog sa usa ka buhatan sa mga pabuto sa ala 1:40 sa hapon sa Lunes, Disyembre 11, 2023 sa Purok Judas Belt, Brgy. 2, dakbayan sa Lapu-Lapu nga nipatay sa upat ka mga tawo ug niangol sa laing unom. Walo ka istruktura ang apektado.

Sa taho sa dySS GMA radio, usa ka kabanay sa usa sa mga nangamatay, niingon nga hayan nibuto ang Bombshell, usa ka matang sa pyrotechnics, dayon nikatay sa ubang mga pabuto sa sulod sa himuanan nga gipanag-iya ni Chito Berdin, 57.

Wa nakagawas ang upat gikan sa buhatan diin paspas kaayo ang pagkatay sa kayo. Nakaplagan sila sa managlahing mga dapit sa buhatanan.

Mga silingan niingon nga nakadungog sila og sipa kaayo nga buto dayon nisunod ang dako kaayo nga ulbo sa kayo.

Si Donald Berdin, pag-umangkon ni Chito nga nahinabi sa sibyaanan, niingon nga nakadungog siya nga nibuto ang Bombshell, apan gitataw sa kabomberuhan sa siyudad nga ila pang gitino kon unsa gyud ang hinungdan sa sunog.

Ang nangamatay giila nga sila si Chito, minyo, tag-iya sa pabrika sa pyrotechnics; Christian Monsanto, in-law ni Chito, Gwen Berdin ug Argie Cegovia, empleyado.

Ang mga biktima nga nakaangkon og mga paso giilang sila si John Reniel Berdin, 8; Justin Yamas, 24; Jeff Reasonable, 20; Maria Johanna Berdin, 37; Julieto Llanas, 23; ug 27 anyos nga lalaki nga wa pa nganli sa pagsuwat ning taho.

Matod ni SF03 Oiretuele Baguio, imbestigador sa Lapu-Lapu City Fire District, nagpadayon pa ang ilang imbestigasyon sa sinugdanan sa kayo. Ang sunog ilang gibana-bana nga nibilin og P300,000 nga danyos.

Ang kanhi barangay kapitan sa Babag 2, Ronie Berdin nga ig agaw ni Chito Berdin nga gikahinabi sa Superbalita Cebu, niingon nga dugay nang nagnegusyo ang iyang ig-agaw og pyrotechnics.

Sukad, way bisan usa ka aksidente nga nahitabo sulod sa iyang buhatanan, dugang sa kanhi opisyal.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph