Nalangkat ang 10 ka pligo nga G.I. sheet o sin sa usa ka balay sa Sityo Lo-oc, Barangay Poblacion, Argao, Cebu sa dihang naigo sa buhawi sa alas 12 sa udto, Oktubre 10, 2023.
Sa pakighinabi sa Superbalita Cebu sa tag-iya sa balay nga si Evangeline Ortega, 44, minyo, siya niasoy nga dihang nikusog ang unos ug uwan inubanan sa kilat, kalit lang milagubo ang ilang atop ug mao na lay nabantayan nga nalangkat kini gumikan sa buhawi.
Sa dihang mituang ang uwan, dali nga gisunod sa magtiayong Ortega ang nangapalid nga sin nga napadpad sa gibana-bana nga gilay-on nga 10 metros.
Ang ilang atop nga nawalis ila lang una nga gibutangan og plywood aron di mahumod ang ilang mga butang nga naa sa kuwarto.
Samtang usa ka mananagat nga si Ramil Gomez nga gikahinabi ning mantalaan misaysay nga iyang nakita ang buhawi nga kalit mitumaw sa ilang baybayon.
Hangin nga nagtuyok nga may dala nga tubig ug may mga sakayan sa panagatan nga giangkorahi ang gipangpadpad. (DVG)