Gisaaran sa Metro Cebu Water District (MCWD) ang mga konsumidor nga mahimo na nga normal ang water supply gikan sa Buhisan dam human nasulbad ang baradong tubo nga nagsumpay paingon sa Tisa filter plant.
Sa interbyu niadtong Enero 24, 2025, si MCWD spokesperson Minerva Gerodias nibutyag nga ang problema nagagikan sa mga yuta ug bato nga ningbara sa tubo nga maghatod og tubig gikan sa dam paingon sa Tisa plant alang sa filtration.
“Initially, the assessment was the water in our slow sand pond in Tisa was not replenished because of a defective valve,” pasabot ni Gerodias.
“But after checking, we found out that the discharge pipe was only clogged.”
Matod ni Gerodias, tungod sa pagkabara sa tubo, wala na mogana og insakto ang valve.
Taliwala niini, wala ra hinuon naguba ang valve.
Ang production team sa MCWD ningsulbad na sa pagkabara sugod sa sayong kabuntagon niadtong Biyernes.
Mga alas 5:00 sa hapon sa samang adlaw, nasulbad na ang pagkabara sa tubo.
Ang planta sa Tisa magdalit og 4,000 cubic meters water matag adlaw sa mga barangay sa Tisa, Labangon ug ubang duol nga mga dapit.
Gitataw ni Gerodias nga dili ra grabe ang kahasol nga nadalit sa problema ngadto sa mga konsumidor gumikan kay aduna silay alternatibong water sources nga gigamit.
Ang Tisa plant nagkaon lang og gamay nga tipik sa matag adlaw nga produksyon sa MCWD nga moabot sa 310,000 cubic meters.
“Residents were not significantly affected since alternative sources supplied water temporarily,” pagtino Gerodias. / CDF