Gisusi sa kapulisan sa lungsod sa Argao, habagatang Sugbo kon ang bukog nga nakaplagan sa alas 9 sa buntag sa Lunes, Mayo 27, 2024, sa bungtod sa Brgy. Casay, di ba iyaha sa usa ka babayeng minyo nga na missing sayo ning buwana.
Mao kini ang gibutyag ni Police Master Sgt. Franklin Payusan Dian, investigator on case, sa interbyo sa Superbalita Cebu.
Matod ni Dian nga ubos sa kamanduan ni Police Major. Ivy Martin Bartolome, hepe sa kapulisan sa lungsod, ilang susihon kon ang mga bukog di ba iya ni Mary Mae A. Mier, 32, minyo, taga sityo Dubdub, Brgy. Talaga, Argao.
Si Mier na-missing ug katapusan nga nakit-an sa Ticoy, Brgy. Bogo sa nahisgutang lungsod niadtong Mayo 11, 2024.
Ang pagduda nga iyaha ang mga bukog gibase sa mga butang nga nakaplagan tupad niini sama sa kwentas, lipstick, sling bag ug sandals.
Kini nga mga butang giila sa iyang anak nga babaye ug bana nga naghinilakay sa pagkakita niini.
Gi request na ang DNA testing sa igsuon ug anak ni Mier aron masuta sa way pagduda nga iyaha kadto nga mga bukog.
Si Dian, sa interview sa Superbalita Cebu, niingon nga mopahigayon pa siya og makuting imbestigasyon pinaagi sa DNA.
Kon makompirmar, iyang susihon kon nganong naabot ang biktima sa mao nga dapit ug kon gipatay ba kini.
Ang kalabera nakit-an sa usa ka lalaking nanguha og lawog sa hayop ug nipahibawo kang Kapitan Marlon “Maloy” Sombilon.
Si Sombilon na maoy nanawag og mga polis sa Argao. Lakip nga na-recover sa dapit ang sakuban sa pusil ug usa ka temporary identification (ID) card.
Giingon nga bisan duha pa ka semana ang pagkamatay sa tawo, basta ang lawas mabantang sa adlaw ug mainitan ingon mahanginan ug kan-on og mananap, daling makalabera ang lawas. / DVG