BULLET proof vest maoy nakaluwas sa polis ug wa maintimano sa pagkaigo dihang dunay armado silang gikaengkwentro alas 5:01 sa buntag sa Hulyo 16, 2025, sa General Genes Street, Barangay Suba, Dakbayan sa Sugbo.
Ang gikaengkwentro sa mga polis mao si Jaymark Arnais, taga Sitio Wakwak, Barangay Sawang Calero nga nadala sab sa Cebu City Medical Center.
Si Police Patrolman Rembrandt Sabandeja, sakop sa Drug Enforcement Unit sa Sa-wang Calero Police Station, luwas na ang kahimtang dihang wala modulot ang tulo ka bala sa kalibre 45 nga gipusil kaniya tungod sa bulletproof vest.
Ang Philippine National Police ang moabaga sa tanang gasto sa pagpatambal kang Sabandeja samtang naa pa siya sa tambalanan.
Gawas sa financial nga suporta posibleng ang Police Regional Office (PRO) 7 mopasidungog sa polis tungod sa pagbuhis sa iyang kinabuhi aron pagtuman sa trabaho. Alang sa hepe sa Cebu City Police Office (CCPO) Police Colonel Enrico Figueroa, dako og matabang sa pagsalbar sa kinabuhi sa mga polis ang pagsul-ob kanunay sa mga bulletproof vest.
Si Police Major NiƱa Cheryl Reyes ang Chief Medical Officer sa Regional Medical and Dental Unit 7 nipahibalo nga kon wala ang bulletproof vest, dako og kadaot ang mahiagoman ni Sabandeja sanglit pulos naa sa dughan ang igo niini.
Mahimong maigo ang baga sa maong polis ug daghang internal organs ang madanyos ilabi na nga kalibre 45 ang gigamit sa suspek.
Si Police Lieutenant Colonel Maria Theresa Macatangay deputy city director sa Cebu City Police Office nibutyag nga nihimo og manhunt ang mga sakop sa Sawang Calero Police Station batok kang Arnais human nga siya ang gitudlo nga responsable sa pagpusil-patay kang Ricardo Igot.
Si Arnais giila nga usa ka sa-kop sa gun-for-hire group sa Sugbo ug nalambigit sab sa pagpa-yuhot sa ilegal nga drugas. / AYB