Gitinguha nga integrated multi-modal bus ug ferry terminal sa dakbayan sa Talisay subay sa Cebu South Coastal Road (CSCR) nga maoy bag-ong mahimutangan sa Cebu South Bus Terminal (CSBT) giduso niadtong Biyernes.
Usa ka pribadong kompaniya ang nisugyot niini ngadto sa Cebu Provincial Economic Enterprise Council (EEC) sa usa ka tigom uban kang Cebu Governor Gwendolyn Garcia niadtong Marso 22, 2024, sa Cebu Capitol Building, matod sa taho gikan sa Cebu Provincial Government Public Information Office sa Sabado, Marso 23, 2024.
Ang gisugyot nga bus ug ferry terminal tukoron kilid sa Cebu South Harbor and Container Terminal Services Corp. (CSHCTSC) nga nahimutang sa utlanan tali sa Dakbayan sa Talisay ug Sugbo subay sa South Road Properties (SRP).
Ang presidente ug chief operating officer sa CSHCTSC nga si Johnny Ng nisugyot niadtong Biyernes ngadto sa gobernador, kinsa maoy nangulo usab sa EEC.
Ang CSHCTSC usa ka kompaniya nga gipanag-iya sa mga Pilipino nga nagtukod ug nag-operate sa usa ka international cargo port sa Talisay City, nga maoy nagdumala sa mga operasyon sa container ug bulk cargo.
Si Garcia unang nihisgot sa ideya sa pagbalhin sa CSBT ngadto sa SRP o sa bisan unsang estratehikong lokasyon niadtong Oktubre 24, 2023.
Uyon ang gobernador sa unang sugyot ni Cebu City Mayor Michael Rama nga ibalhin ang terminal sa bus sa laing lugar tungod sa nagkagrabeng trapik sa Natalio Bacalso Avenue ug aron mahatagan og dalan ang padayong konstruksyon sa Cebu Bus Rapid Transit (CBRT).
Niadtong Marso 6, 2024, gipatugbaw na usab ni Rama ang sugyot ug nihangyo sa Konseho sa Dakbayan nga mopalabang og ordinansa nga makapadali sa pagbalhin sa bus terminal gikan sa kasamtangang kahimtang niini ngadto sa SRP.
Ang Cebu Provincial Government nanag-iya ug nagdumala sa north ug south bus terminals sa Cebu City, usa sa N. Bacalso Ave. ug ang usa nahimutang sa open parking lot sa SM City Cebu sa North Reclamation Area.
Ang gisugyot nga bag-ong integrated multi-modal bus terminal gitakdang ma-accommodate sa mga taxi, jeepney, ug ferry boats, matod ni Garcia niadtong Oktubre 2023.
Dugang ni Garcia nga bukas ang Kagamhanang Probinsiyal sa sugyot nga himuon sa Private-Public Partnership (PPP).
Busa, ang sugyot ni Ng nihaum sa plano sa Kapitolyo nga ibalhin ang bus terminal ngadto sa bag-ong lokasyon ug mapaluag usab ang trapiko sa dakbayan sa Sugbo.
Gisultihan ni Garcia si Ng niadtong Biyernes nga mosumiter og pormal nga unsolicited proposal ngadto sa EEC, sa baylo, ang EEC mo-review ug motuki sa proposal sa dugang economic enterprise alang sa probinsiya.