Bus stop duol sa Kapitolyo sa Sugbo padayong gisupak

 BUS STOP: Kini ang bus stop sa Cebu Bus Rapid Transit project sa dakbayan sa Sugbo duol sa Kapitolyo nga nasanta ang trabaho tungod sa pagsupak ni Gob. Gwendolyn Garcia ug Hunta sa Lalawigan. / FILE FOTO
BUS STOP: Kini ang bus stop sa Cebu Bus Rapid Transit project sa dakbayan sa Sugbo duol sa Kapitolyo nga nasanta ang trabaho tungod sa pagsupak ni Gob. Gwendolyn Garcia ug Hunta sa Lalawigan. / FILE FOTO

Padayong gisupak nila ni Cebu Governor Gwendolyn Garcia, Bise Gobernador Hilario Davide III ug sa 17 ka mga bokal sa Hunta Probinsyal ang gipresentar nga disenyo alang sa bus stop nga tukuron sa Osmeña Boulevard, atubangan sa Capitol building.

Kini subling gipadayag atol sa tigom niini tali sa mga opisyal ug ni Engr. Norvin Imbong, project manager sa Cebu Bus Rapid Transit (CBRT) sa Department of Transportation (DOTr) sa Martes, Abril 30, 2024 sa Kapitolyo.

Sa taho gikan sa Cebu Provincial Information Office, giingong wala nakauyon ang mga opisyal sa gipresentar nga disenyo sa CBRT gumikan sa gituohang negatibo nga impact niini sa visual ug cultural integrity sa edipisyo.

Sa linaing pakighinabi sa SunStar Cebu, si Imbong niingon nga wala sila motutok sa diskusyon sa bus stop duol sa Kapitolyo apan ang pagkuha sa pag-uyon sa mga opisyal sa Kapitolyo sa pagpalambo sa sidewalk ug pagbutang og mga suga.

Kahinumdoman, una nang nasayran nga ang edipisyo sa Kapitolyo sa Sugbo usa ka heritage structure ug cultural treasure nga protektado sa mga balaod sa nasod.

Gawas sa disenyo, giisa usab sa mga opisyal ang ilang concerns sa posibleng paghuot sa trapiko sa dapit tungod sa presensya sa bus sa mga bus stations nga gilantaw nga mag-limit sa dalan nga maagian sa pribado ug pampublikong mga sakyanan.

Hinungdan nga gisugyot sa mga bokal nga gikinahanglan ang pagpangita og laing solusyon aron maalibyuhan ang naasoy’ng concerns.

Matod ni Imbong nga iyang nasabtan ang sentimento sa mga opisyal apan bugtong ang Department of Transportation (DOTr) nga maoy lead agency sa pag implementar sa proyekto ang makausab sa mga disenyo ug plano.

Gidugang ni Imbong nga gawas sa CBRT project, isunod usab niini ang pagpanindot sa mga sidewalk gikan sa Fuente Rotunda paingon sa Capitol area.

Lakip sa himuong pagpanindot ang pagpamutang og streetlights, paving blocks ug pagbutang og strips aron mahimong pedestrian-friendly ang lugar, butang nga giuyonan sa mga opisyal.

Hinungdan nga gilauman nga iduso sa mga bokal ang usa ka resolusyon sa Hunta Probinsyal nga nagpakita og suporta sa himuong sidewalk beautification ug pagpreserbar sa cultural heritage sa Kapitolyo. / ANV, RRM

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph