Kapin sa P20 milyunes nga balor sa ilegal nga drugas ang nasakmit sa mga sakop sa Philippine Drug Enforcement Agency - Regional Special Enforcement Team - Mandaue City Office uban sa PDEA Cebu Provincial Office, Naval Forces Central ug Talisay City Police Station atol sa buy-bust alas 2:55 sa hapon, Sabado, Hulyo 5, 2025 sa R. Rabaya Street, Barangay Cansojong, Dakbayan sa Talisay.
Ang nasikop giila nga si Merian Sancija Borkowski alyas “Ann,” 36, negosyante nga residente ra usab sa maong lugar.
Nakuha gikan kaniya ang binulto sa gituohang shabu nga motimbang sa 3,000 gramos nga dunay estimated average market value nga P20.4 million.
Lakip sa nakuha sa mga operatiba ang boodle money nga maoy gigamit sa buy-bust, duha ka smart phones, backpack, ug ubang mga ebidensya nga naa na sa kustodiya sa PDEA 7.
Sigun sa PDEA 7 nga usa ka semana nga gipaubos sa case buildup si Merian human madawat ang kasayuran gikan sa usa ka kasaligang tinubdan.
Giingong makabaligya kini og 3 kilos matag semana ug ang iyang area sa distribution sa illegal nga drugas mao ang tri-cities nga mao ang Cebu, Mandaue, ug Lapu-Lapu.
Gipaubos sa imbestigasyon sa PDEA 7 kung kinsa ang iyang supplier ug asa usab gikan ang maong ilegal nga drugas. / AYB