Dili makaduwa ang pambatong sentro sa Team Japeth nga si Christian Standhardinger sa Philippine Basketball Association (PBA) Season 48 All-Star Game nga gikatakda karong Marso 24, 2024, sa Bacolod City.
Kini gumikan kay nasakit ang pambatong big man sa Brgy. Ginebra Gin Kings sa wala pa ninglarga ang PBA delegation paingon sa City of Smiles ning Huwebes, Marso 21, 2024.
Nagkanayon si PBA deputy commissioner Eric Castro nga nagsuka-suka ang Fil-German nga gitawag og C-Stan ug dili maayo ang pamati sa lawas niini.
Gumikan sa kahagip-ot sa oras, dili na mokuha og laing magduduwa ang PBA aron ipuli sa luna ni Standhardinger, kinsa maoy first overall pick atol sa All-Star drafting.
Sa laing bahin, gipadayag ni Magnolia Hotshots guard Paul Lee ang iyang kaandam nga depensaan ang iyang korona sa three-point shootout.
Dili kini sayon nga tahas alang kang Lee gumikan kay ikaparang niya ang dekalidad nga mga tirador sa gawas nga naglakip ni hometown favorite James Yap, kanhi kampyon ning maong kompetisyon.
Ang ubang mosuway sa pag-ilog sa titulo ni Lee mao sila si Maverick Ahanmisi, Alec Stockton, Chris Newsome, Rob Herndon, Arvin Tolentino, Ken Tuffin, Andrei Caracut, Marcio Lassiter, Javi Gomez de Liano ug Calvin Oftana. / ESL