Giaprobahan sa Civil Aviation Authority of the Philippines (Caap) ang hangyo ni Bacolod City Mayor Alfredo Abelardo Benitez paggahin og P205 milyunes alang sa pagpalambo ug renovation sa Bacolod-Silay Airport sa Dakbayan sa Silay, Negros Occidental.
Sa suwat ni Benitez pinetsahan og Abril 24, 2025, si Lieutenant General Raul del Rosario, director general of Caap, nagkanayon nga nigahin sila og P205 milyunes alang sa Bacolod-Silay Airport Development Project ubos sa ilang 2025 Corporate Operating Budget (COB).
Ang gigahin nga budget naglakip sa pagpalambo sa Passenger Terminal Building (PTB) kantidad og P200 milyunes nga gitumong sa pagdugang og check-in area ug pre-departure area aron pagtubag sa nagkadaghang mga pasahero ug mapalapdan ang Access Road sa Fire Station Building (FSB) kantidad og P5 milyunes.
Matod niya nga ang Tourism Infrastructure ug Enterprise Zone Authority (Tieza) nisaad nga ilakip sa ilang pundo ang Asphalt Overlay sa Existing Runway sa Bacolod-Silay Airport aron pagsiguro sa luwas nga aircraft operations.
Niadtong February 2025, si Benitez nanawagan sa Caap paggahin og P200 million alang sa improvement ug Renovation sa Bacolod-Silay Airport.
Matod ni Del Rosario nga sa pagkakaron naghimo sila og rehabilitation sa PTB project sa Bacolod-Silay Airport kantidad og P45 milyunes aron pag-ayo sa karaan ug daghan nang guba sa building sa PTB.
Ang proyekto gitakda nga ma-human sa Disyembre 2025.
Sa iyang bahin, si Benitez nipadayag sa iyang pasalamat sa Caap pag-aprobar sa iyang hangyo.
“I thank Caap for approving and allocating P205 million for the Bacolod-Silay Airport upgrade. This, along with Tieza’s support and the ongoing P45 million terminal rehabilitations bring us closer to a safer, more efficient, and passenger-friendly airport for Bacolod and the rest of the province,” matod ni Benitez . / MAP