Nadakpan sa kapulisan ang usa ka 34-anyos nga call center agent human gireklamo sa iyang asawa kay gibunalan siya og helmet niini nga niresulta sa mga bun-og sa iyang paa ug agtang.
Ang suspek nga giila sa alyas nga Glenn, residente sa Barangay South Poblacion, Dakbayan sa Naga, nasikop alas 3:00 sa hapon, Huwebes, Agusto 20, 2026.
Gidakop ang suspek pinaagi sa warrant of arrest alang sa kasong paglapas sa Republic Act 9262 o Anti-Violence Against Women and Their Children (VAWC) Act.
Base sa imbestigasyon, nahitabo ang pag-atake niadtong Mayo 13, 2026. Sumala sa biktima, gawas sa mga bun-og nga iyang naangkon gikan sa pagpamuspos og helmet, nag-antos sab siya og grabeng trauma sa emosyon ug hunahuna.
Wala gipadayag sa report ang hinungdan sa ilang panaglalis.
Human sa hitabo, nagtagutago ang suspek, apan nasubay ra gihapon siya sa Tracker Team sa City of Naga Police Station gamit ang warrant nga gipagawas ni Presiding Judge Albie Carmelo R. Pescadero niadtong Agusto 19, 2026.
Giatiman na sa kagamhanan ang legal nga proseso batok sa suspek kinsa gitugotan sa korte nga makapiyansa og P72,000 alang sa iyang temporaryong kagawasan. / ABC