Nakuha ni TNT Tropang Giga star Calvin Oftana ang dungog isip labing bag-ong Three-Point King sa Philippine Basketball Association (PBA).
Kini human niya napatigbabawan ang NUSTAR 3-Point Shootout sa PBA All-Star Weekend niadtong Sabado, Marso 23, 2024, sa University of St. La Salle Coliseum.
Sa final round, nakarehistro si Oftana og 25 puntos aron lupigon ang defending champion nga si Paul Lee sa Magnolia Chicken Timplados Hotshots ug Chris Newsome sa Meralco Bolts.
Si Oftana, kinsa maoy katapusang shooter sa elimination round, nakatali og 22 puntos sa eliminations aron angkunon ang ikatulo ug katapusang puwesto sa finals.
Si Newsome maoy naghari sa elimination round pinaagi sa iyang 28 puntos samtang ikaduha si Lee.
Nihugyaw ang mga tumatan-aw dihang napasulod ni Oftana ang tanang lima ka mga bola sa ikaduhang rack nga maoy dakong hinungdan nga nakuha niya ang kadaugan nga nagtunol kaniya og P30,000 nga ganti.
Sa laing bahin, gipamatud-an ni Raymond Almazan sa Meralco Bolts nga usa siya sa labing hingigo nga big men sa PBA pinaagi sa pagdaog sa NUSTAR Resort and Casino Long Distance Three-Point shootout big men edition.
Si JM Calma sa NorthPort Batang Pier maoy nidaog sa Obstacle Challenge. / ESL