Gipanalipdan ni Bokal Stanley Caminero kaniadtong Martes, Hulyo 22, 2025, batok sa pagsaway sa publiko nga gipasagdan sa kanhi administrasyon ni Gobernador Gwendolyn Garcia ang sektor sa panglawas sa Lalawigan sa Sugbo.
Namulong sa usa ka news forum, niinsister si Caminero nga dako ang kalambuan nga nahimo ilabi na sa pagtukod og importanteng pasilidad sa panglawas.
“In fairness to the past administration... there were important health facilities that were set up,” matod ni Caminero.
Iyang gitumbok ang pagtukod og unom ka hemodialysis centers sa tibuok probinsiya sulod sa tulo ka tuig isip pamatuod niini nga mga paningkamot.
Kini nga mga hemodialysis center nahimutang sa mga provincial hospital sa Carcar City, Balamban, Danao City, Bogo City, Bantayan District Hospital, ug Ricardo Maningo Memorial Hospital sa Camotes Islands.
Si Caminero nga usa ka medical doctor, nipasabot sa kakomplikado sa pagtukod og ingon niini nga mga specialized unit.
“It was never done before, and it is not easy to set up a hemodialysis center, and that’s something I would really give credit to the past administration,” iyang gidugang..
Gibutyag usab ni Caminero ang SugBucas, usa ka programa nga gisugdan sa Probinsiya sa pakigtambayayong sa Department of Health.
Kini nga programa nagbutang og mga doktor ug nars sa mga provincial hospital sama sa Carcar City nga malampusong nakapahupay sa Vicente Sotto Memorial Medical Center.
Nidugang si Caminero nga dili patas ang pag-ingon nga walay nahimo ang milabay nga administrasyon.
Gipadayag ni Caminero ang iyang hugot nga suporta sa kasamtangang administrasyon bahin sa panglawas nga nag-ingon nga ang bisan unsang mga bahin nga wala matubag kaniadto mahimo na karong sulbaron.
Nagtuo siya nga masinati ra sa katawhan ang kaayohan sa mga lakang sa panglawas sa bag-ong administrasyon. / JPS