Gilusad na sa Kagamhanan sa Probinsya sa Sugbo ang labing una ug nag-inusarang hemodialysis center sa isla sa Camotes.
Ang Kagamhanan sa Probinsya sa Sugbo nilusad sa 10 ka hemodialysis machines sa Ricardo L. Maningo Memorial Hospital (RLMMH) sa lungsod sa San Francisco sa Marso 18, 2024.
Lakip sa makabenepisyo niini nga libre ang Persons with Disabilities (PWD) ubos sa Abag Sugbo Program.
Gilauman nga maalibyuhan ang dialysis patients sa mao nga mga isla ug mamenusan na ang ilang gasto sa plite kay di na sila kinahanglan mobiyahe sa mainland Cebu aron lang magpatambal.
Gipahibaw sa kagamhanan nga nipaubos na sa insaktong training ang tanan nga mga nurse ug staff sa maong pasilidad pagsiguro nga luwas ang mga pasyente uban sa pakig-alayon niini sa Vicente Sotto Memorial Medical Center (VSMMC).
Ang 10 ka mga dialysis machines gi-provide kini sa Medtronix Medical Supplies and Equipment nga maoy kaabag sa Kapitolyo sa uban pang dialysis centers sa Probinsya.
Subay sa impormasyon sa kagamhanan, anaa sa P2,500 ang matag session sa dialysis treatment sa dialysis centers sa Probinsya nga giingong mas barato kon itandi sa hemodialysis center sa pribado’ng mga hospital nga sagad naa sa mga sentro nga dakbayan.
Sa kasamtangan aduna nay upat ka dialysis centers ang gibutang sa Probinsya nga anaa nahimutang sa provincial hospitals sa lungsod sa Balamban, dakbayan sa Danao ug dakbayan sa Carcar. / ANV