Canvasser gipusil patay sa kauban

Canvasser gipusil patay sa kauban
SunStar Local News GPX

Gituohang panagkompetensya sa panginabuhi maoy motibo sa pagpusil sa usa ka canvasser sa iyang kauban alas 11 sa Biyernes sa gabii, Marso 1, 2024 sa Purok Kalipay, Brgy. Panoypoy, lungsod sa Consolacion.

Ang biktima giila nga si Richard Bomongcag, hamtong, ulitawo apan may kapuyo, taga Paknaan, Siyudad sa Mandaue.

Ang suspek nga wa pa madakpi giila nga si Jay R Basergo, alyas Dodong, taga Brgy. San Jose, Siyudad sa Sugbo.

Sila puro canvasser sa Virlo Construction Corporation.

Sa pakisusi sa Superbalita Cebu sa kapulisan sa Consolacion, nasayran pinaagi sa imbistigasyon ni P/Lt. Michael John Bañes, ubos sa kamanduan sa ilang hepe nga si P/Lt. Col. Verniño Bustillo Noseralle, ang duha nag-abot sa maong dapit.

Sila nadunggan sa mga saksi nga may mainiton nga naglalis mahitungod sa ilang pagka canvasser sa Virlo Construction.

Ilang nadunggan ang suspek nga nisulti sa biktima nga “imo dyud ko kulban sa kaldero” ug dayon gipusil si Bamongcag sa makatulo ka mga higayon gamit ang .38 nga kalibre nga pusil.

Ang biktima nga nakabaton og mga samad pinusilan sa nagkadaiyang bahin sa lawas gidali sa pagdala sa duol nga ospital apan patay nang niabot.

Sa pagsuwat ning taho, ang suspek wa pa madakpi sa kapulisan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph