Nakabsan sa iyang kinabuhi ang usa ka caretaker sa sand and gravel, samtang naangol ang iyang kabanay human sila pamusila alas 9 sa buntag sa Sabado, Abril 12, 2025, sa Sitio Lower, Camansiles, Brgy. General Climaco, Dakbayan sa Toledo.
Si Bonifacio Dacuma King, 53, minyo, caretaker sa usa ka sand and gravel nga negosyo ug nagpuyo sa nahisgutang lugar, gideklarar nga patay pag-abot sa Toledo City General Hospital.
Ang iyang kabanay nga naangol mao si Jayk Canoneo Dacuma, 27 anyos, minyo.
Karaang panagbangi tali sa suspek ug sa biktima kabahin sa ilang trabaho maoy gitumbok nga motibo sa krimen.
Hinuon, nailhan na ang mga suspek nga sila si Arman Habasa, hingkod ang panuigon, minyo nga taga Barangay Pangamihan, Toledo City, ug si Junrey Abadinas.
Ang duha padayon pa’ng gipangita sa kapulisan sa Toledo City Police Station. / GPL