PATAY na nga nadangat sa tambalanan sa lungsod sa Alcoy, Probinsya sa Sugbo ang caretaker sa usa ka resort sa Barangay Daanlungsod human ni matagak sa hagdanan kay naigo sa pagpatid sa usa ka lalaki nga nag-away sa iyang asawa alas 10 sa gabii, Sabado, Hulyo 19, 2025.
Ang biktima giila nga si Edgardo Pasco, 55, caretaker sa Edwards Place apan lumad nga taga Bacolod City, Negros Occidental.
Nakaangkon siya og dakong kadaut sa iyang ulo.
Sa imbestigasyon sa Alcoy Municipal Police Station, nga ang magtiayon nga silang Philip Michael Jimenez Malba, 39, ug Johanna Mosqueda Malba, 40, usa ka virtual assistant sa French company nga Damart UK, pulos kasamtangan nga nagpuyo sa Barangay Daanlungsod, ang giingong nag-away.
Ang ilang away misangpot kini sa komosyon nga nakatugaw sa ubang customer sa maong resort nga tungod ani miduol na ang caretaker nga si Pasco.
Gihangyo ni Pasco nga mohunong na sa ilang panag-away apan ang suspek nga si Philip nasuko ngano’ng nag apil-apil kini nga maoy hinungdan nga iya ning gipatiran.
Tungod sa kakusog sa patid nahulog ang biktima sa ubos sa hagdanan ug tungod sa kadaut sa ulo nga nahiagoman niini dali nga nanawag og tabang ang mga empleyado lakip na ang mga guest sa maong resort sa Municipal Disaster Risk Reduction and Management Office rescue team aron madala sa tambalanan.
Apan pag-abot sa tambalanan gideklara kini nga dead on arrival alas 10:29 sa gabii sa susamang petsa ni Dr. David Maranon.
Milusad og hot pursuit operation ang Alcoy Municipal Police Station, inabagan sa mga barangay tanod, batok sa suspek nga giingong misibat sa dihang iyang nasayran nga grabe ang kahimtang sa biktima.
Pagka ala 1:30 sa kaadlawon, Dominggo, Hulyo 20, 2025, ilang nadakpan ang suspek nga nitago sa mga tanom nga gulayan sa luyo sa boarding house niini.
Kasamtangan nga gikustodiya sa custodial facility sa Alcoy Municipal Police Station ang suspek ug giandaman na ang kasong homicide nga ipa-saka batok kaniya. /AYB