Makubra na karong Hunyo 7, 2025 ang quarterly financial assistance alang sa senior citizens sa Cebu City, pahibalo ni outgoing Mayor Raymond Alvin Garcia.
Ang maong pahibalo gipaagi sa Facebook post pinetsahan sa Martes, Mayo 27, 2025.
Ang mga kwalipikadong senior citizen makadawat og tag P3,000 nga naglangkob sa ilang binuwan nga allowance gikan sa Abril hangtod Hunyo. Kini pinasikad sa City Ordinance 2453, nga naghatag kanila og P1,000 nga binuwan nga allowance nga ihatag matag tulo ka bulan.
Ang mga senior citizen sa siyudad nakadawat na sa ilang unang quarter nga pinansyal nga hinabang niadtong Marso 3, 2025.
Gibanabana nga adunay 90,000 ka rehistradong senior citizen sa Siyudad sa Sugbo nga benepisyaryo niini nga programa sukad pa niadtong tuig 2013. / JPS