Himuon na sa Dakbayan sa Sugbo nga P15,000 ang tinuig nga cash aid alang sa mga rehistradong senior citizen sa aron makasapar sa nagsaka nga presyo sa mga palaliton.
Matod ni Konsehal Sisinio Andales sa iyang privilege speech niadtong Agosto 12, 2025, dili na igo ang kasamtangang P12,000 nga tinuig nga hinabang para sa mga senior citizen beneficiaries sa pagtabon sa ilang batakang panginahanglanon tungod sa inflation ug taas nga gasto kada adlaw..
Nangatarungan si Andales nga ang pagsaka sa presyo sa palaliton nakapagamay sa kantidad sa financial assistance.
Si Andales nga usa sab ka senior citizen, nisugyot nga P15,000 ang himuong financial assistance gikan sa P12,000.
Nisugyot sab siya og adjustment sa eligibility requirements para sa financial assistance.
Apil niini ang pag-usab sa cutoff year para sa mga beneficiaries gikan sa 2013 ngadto sa 2021, nga matod ni Andales, makapahimo sa mas daghan pa nga mga senior citizen nga makadawat sa aid.
“Pinaagi sa pag-recalibrate sa cutoff year, atong giila ang nagsaka nga gidaghanon sa mga tigulang nga residente sa Cebu City nga wala pa makapahimulos sa ordinansa bisan dili kini ilang sala,” dugang pa niya.
Gihangyo ni Andales ang Office of Senior Citizens Affairs (OSCA) sa pagtigom sa comprehensive data sa demographics sa mga senior citizen ug sa gidaghanon sa kasamtangang mga beneficiaries.
Apil sa iyang gipangayo mao ang report sa potential financial impact sa gisugyot nga increase.
Giawhag niya ang City Council sa pag-aksyon dayon sa maong sugyot, pinaagi sa pagpasar og balaod nga motubag sa panginahanglan sa mga senior citizen.
Ang sugyot ni Andales gi-refer sa Committee on Budget and Finance ug sa Committee on Senior Citizens Affairs.
Ang kasamtangang financial assistance program para sa mga senior citizen gimando ubos sa City Ordinance No. 2453, nga gi-amendahan sa Ordinance No. 2529.
Ubos sa maong ordinansa, ang mga senior citizen makadawat og P3,000 quarterly, nga mo-total og P12,000 sa usa ka tuig. / EHP