Gipanghatag na sa kagamhanan sa Dakbayan sa Lapu-Lapu pinaagi sa Social Welfare and Development Office (CSWDO) ang cash aid alang sa mga senior citizen ug persons with disabilities (PWDs).
Ang pangulo sa CSWDO, Catherine Ladaga ug ang Office for the Senior Citizens Affairs (OSCA), maoy nanghatag sa mid-year cash gifts ngadto sa tanang senior citizens ug PWDs mas sayo kaysa gitakda nga schedule.
Ang pagpanghatag gisugdan niadtong Abril 11-13, ug gilugwayan aron maatiman ang tanang beneficiaries ug hangtod kini sa Abril 15 ug magpadayon sa Abril 21-23.
Ang pagpanghatag gihimo sa Lapu-Lapu City Hall Grounds.
Ang desisyon pagsayo sa pagpanghatag sa cash aid nga gitakda unta sa naandang schedule sa June gihimo aron kalikayan ang mga kalangay nga mahitabo tungod sa nagsingabot nga eleksyon.
Ang sayo nga pagpanghatag nahitabo human ang kagamhanan nangayo og exemption gikan sa Election Ban gikan sa Commission on Elections (COMELEC) Central Office.
Ang request gisumiter niadto pang February 2025 ug naaprobahan sa March 5, nga nagtugot sa pagpadayon sa pagpanghatag bisan pa og naatol sa election period.
Ang CSWDO ug ang OSCA maoy nagdumala sa distribution process, pagsiguro nga ang senior citizens ug PWDs makadawat sa ilang cash gifts sa tukmang panahon. / DPC