Makadawat na og financial incentives ang tanang mga tinun-an sa dakbayan sa Talisay nga makapasar sa Bar ug board examinations sugod sa 2024.
Kini maoy gipahibalo sa Kagamhanan sa Siyudad human gipasar sa Konseho sa Siyudad ang ordinansa nga nagtinguha sa paghatag og ganti pinaagi sa incentives alang sa mga malampuson nga ni-top o nakapasar sa licensure ug Bar examinations sa Sugbo.
“Gipasar ning maong ordinansa isip pasalamat namo sa atong mga Bar and board passers sa ilang pagpaningkamot nga makab-ot nila ang damgo nga mahimo’ng mga licensed professionals,” tipik sa pamahayag sa kagamhanan.
Ang mga makakab-ot sa unang puwesto hangtod sa ika-napulo nga puwesto sa Physician Licensure Examination ug Bar Examinations makadawat og incentive gikan sa kagamhanan.
Alang sa mga makatungtong sa unang puwesto makakuha og P100,000 samtang anaa sa P10,000 sa ika-10 nga dapit.
Samtang alang sa mga makapasar sa licensure examinations sa pagka doktor, gantihan og P50,000 sa makakuha sa unang puwesto samtang P5,000 ang incentive alang sa makakuha sa ika-napulo nga puwesto.
Hinuon, duna usa’y cash incentives nga moabot og P10, 000 alang sa Bar passers ug P5,000 alang sa mga Licensure examination passers.
Nanghinaot ang kagamhanan nga sa maong paagi, mas magkugi ang mga tinun-an nga makab-ot ang ilang mga gitinguha pinaagi sa tagsa-tagsa niini nga pagpaningkamot.