Human sa dul-an sa usa ka tuig nga wala siya nakaaway, si kanhi three-division world champion Filipino Johnriel Casimero nakakita og bag-ong promoter human kini opisyal nipirma og kontrata sa Kameda Promotion, usa ka Japanese promotional outfit.
Niadtong 2023, si Casimero nipirma sa laing promotional outfit sa Japan nga mao ang Treasure Boxing Promotion.
Ubos sa TBP, tulo ka mga away ang nasagubang ni Casimero apan wala nahitabo ang gipangandoy niini nga makontra si Japanese superstar Naoya “Monster” Inoue.
Human sa katapusang away ni Casimero, diin nirehistro kini og 1st round knockout nga kadaugan batok ni kanhi world title challenger American Saul Sanchez, nabuwag na kini sa TBP.
Si Casimero, 36, kasamtangang ranked No. 7 sa World Boxing Organization (WBO), No. 13 sa World Boxing Council (WBC) ug No. 10 sa International Boxing Federation (IBF) super bantamweight division.
Ang lumad nga taga Ormoc City, kinsa nahimong world champion sa light flyweight, flyweight ug bantamweight divisions, adunay 34-4-1, 23KOs nga rekord. / EKA, ESL