Castillano gitudlo isip acting RD Comelec NIR

Castillano gitudlo isip acting RD Comelec NIR
Atty. Lionel Marco Castillano

Gitudlo isip acting regional director (RD) para sa Negros Island Region (NIR) ang kasamtangang Regional Director sa Commission on Elections (Comelec) sa Central Visayas nga si Lionel Marco Castillano.

Magsugod karong Hulyo 1 sa bag-ong katungdanan si Castillano samtang nag-andam siya sa pagdumala sa lokal nga eleksyon sa tuig 2025. Gikumpirma ni Castillano nga ang opisina sa rehiyon sa NIR mahimutang sa Bacolod City, pinaagi sa phone interview kagahapon, Hunyo 28, 2024.

Samtang si Region 10 Regional Director Francisco Pobe maoy mohulip ni Castillano isip Acting Regional Director sa Central Visayas.

Mipadayag si Castillano nga siya masaligon nga ang pagbutang kaniya sa bag-ong posisyon dakog ikatabang sa pagpalapad sa accessibility sa mga serbisyo sa Comelec ngadto sa mga tawo sa NIR.

Iya usab gipasalig nga ang mga polisiya ug mga pamaagi nga iyang giputuman sa Central Visayas, ipatuman usab sa NIR.

“The usual gihapon akong pamaagi, ganahan ko nga hapsay ang voting experience nato sa 2025”, matod ni Castillano.

Plano usab ni Castillano nga ipadayon ang inklusibong pamaagi gikan sa Central Visayas ngadto sa NIR, diin mopahigayon og espisyal nga registration drive alang sa mga tawong gikuhaan og kagawasan, mga senior citizen, mga tawo nga may kapansanan, ug mga buntis nga kababayehan. / CAV

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph