Protektahan ni Filipino KJ Cataraja ang iyang No.1 super flyweight rating sa World Boxing Organization (WBO) sa iyang pagpakigbatok ni Mexican Kenbun Torres karong adlawa, Sabado, Agusto 24, 2024 sa Yamato Arena sa Osaka, Japan.
Grabe ka mahinungdanon alang ni Cataraja kining maong away gumikan kay posibleng mao kini ang katapusang taytayan nga iyang pagalatason paingon sa usa ka world title fight.
Sa interbyu sa Sun.Star Cebu, nagkanayon si Cataraja nga dili niya usikan kining maong oportunidad.
Ang kanhi ALA fighter niangkon nga mas lisod kini nga tahas alang kaniya apan andam ug masaligon siya nga molampos.
Gipasabot ni Cataraja nga iyang natun-an og maayo ang away ni Torres pinaagi sa pagtan-aw og videos hilabi na ang knockout nga kadaugan ni Torres batok sa laing Pinoy nga si Reymart Gaballo.
Matod ni Cataraja nga kinahanglang magmatngon siya sa hook ni Torres, nga maoy nagpatikangkang ni Gaballo.
Gawas sa WBO, si Cataraja ranked. No. 11 sab sa International Boxing Federation (IBF) ug No. 15 sa World Boxing Council (WBC).
Si Cataraja naggunit og 17-0, 13KOs nga rekord samtang si Torres adunay 14-5, 10KOS nga baraha. / EKA