Gipanglampornas sa hosts Cleveland Cavaliers ang Los Angeles Lakers, 134-110, aron inaton ang ilang limpyong rekord ngadto sa 5-0 kagahapon, Huwebes, Oktubre 31, 2024 (PH time), sa National Basketball Association (NBA).
Kini maoy labing unang higayon nga nakasugod og 5-0 ang Cavaliers gikan niadtong 2016-17 season ug ikatulo pa lang kini nahibato sa kasaysayan sa ilang prankisa.
Gipanglulohan ni Evan Mobley ang dominasyon sa Cavaliers pinaagi sa iyang 25 puntos, nidugang og 24 puntos si Donovan Mitchell samtang nihatag og 20 puntos ug 17 rebounds si Jarrett Allen.
Ang Lakers nga natagak sa 3-2 nga rekord, gipangulohan sa kanhi lider sa Cavaliers nga si LeBron James pinaagi sa iyang 26 puntos, nihatag og 22 puntos ug 13 rebounds si Anthony Davis samtang nitunol og 18 puntos si Delton Knecht.
Pagsugod pa lang sa engkuwentro, ningbulhot na dayon ang opensa sa Cavaliers ug nakaposte sila’g 42-23 nga labaw pagkahuman pa lang sa 1st quarter.
Human niini, wala na nakabangon ang Lakers hangtod na sa ilang hingpit nga pagkalubong.
Ning sangkaa, nasaksihan ang labing unang puntos sa anak ug kauban ni James nga si Bronny.
Si Bronny kinsa nagdako sa Akron nga silingang siyudad sa Cleveland sa Ohio state, giabihan og maayo sa mismong fans sa Cavaliers.
Dihang kontrolado na sa Cavaliers ang duwa sa hinapos nga bahin, ang ilang fans naninggit og “We want Bronny!”.
Tuod man gipasulod sa Lakers si Bronny sa nahabiling 5:16 minutos.
Narehistro ni Bronny ang labing una niyang puntos sa NBA pinaagi sa jumper sa nahabiling 2:03 minutos. / AP