Nagbangis sa opensa si Dean Wade sa 4th quarter aron agakon ang hosts Cleveland Cavaliers sa makapakaging nga kadaugan batok sa overall leader Boston Celtics, 105-104, ning Miyerkules, Marso 6, 2024 (PH time) sa National Basketball Association (NBA).
Gimugna ni Wade sa 4th quarter ang 20 sa iyang career-high 23 puntos sa 8-of-11 shooting.
Nirehistro sab siya og 6-of-9 sa three-point area diin lima niini iyang gihimo sa 4th quarter.
Matod ni Wade nga sa iyang panan-aw, mura’g swimming pool ang gidak-on sa ring sa 4th quarter. “The rim looked like a swimming pool,” matod niya.
Ning sangkaa, ningkulit og kasaysayan ang Cavaliers human sila hingpit nga nakabangon gikan sa 22 puntos nga pagkalubong sa 4th quarter.
Ilaha kining nabuhat nga wala si All-Star Donovan Mitchell (adunay angol sa tuhod) unya naangol (sprained ankle) pa gyud ang lain nilang pambato nga si Evan Mobley sa 3rd quarter.
Naggukod ang Cavaliers, 93-71, sa nahabiling 9:00 minutos dihang nagsugod pagpauwan og three-point shots si Wade.
Gituldokan ni Wade ang kainit sa iyang opensa pinaagi sa putback dunk sa nahabiling 19.1 segundos nga maoy nagpadaog sa Cavaliers.
Si Allen nidugang og 21 puntos samtang ning-amot og 16 puntos matag usa sila si Isaac Okoro ug Darius Garland alang sa Cavaliers.
Ning sangkaa, giputol sa Cavaliers ang 11 ka sagunson nga kadaugan sa Celtics, nga maoy labing taas ning maong season.
Ang Celtics gipangulohan ni Jayson Tatum pinaagi sa iyang 26 puntos, nihatag og 24 puntos si Kristaps Porzingis samtang nitampo og 21 puntos si Jaylen Brown. / AP