Gipasidunggan sa Police Regional Office (PRO) 7 ang mga opisyal ug kawani sa kapulisan sa Sugbo atol sa ilang traditional Monday flag raising ceremony tungod sa dinalian nga pagkasulbad sa kamatayon ni Leo Leaño sa Barangay Sudlon 1, Dakbayan sa Sugbo.
Ang paghatag sa pasidungog gipangulohan ni National Police Commission (Napolcom) Commissioner Alvin S. Mojica, PhD, kauban si PRO 7 Regional Director Police Brigadier General Arnold E. Abad.
Gitaod ang Medalya ng Kagalingan (PNP Medal of Merit) ngadto sa mga nangulo sa operasyon nga silang Police Colonel Ricky Sumalde, hepe sa Cebu City Police Office (CCPO); Police Lieutenant Colonel Gerard Ace Pelare, deputy city director for operations; ug Police Captain Jurry Papasin, hepe sa Malubog Police Station.
Nasulbad ang maong krimen sulod lang sa duha ka adlaw diin nadakpan ang tulo sa upat ka mga suspek nga silang Ritchie Batican Calunsag nga maoy gitumbok nga lider, Eleazar Angustia Nace ;drayber, ug John Elvis Catantan Gutobat ;gunman, samtang padayon pang gipangita ang usa ka alyas "Shaun."
Gihatagan usab og Medalya ng Papuri (PNP Commendation Medal) silang Police Colonel Lourdiza Cejes sa Regional Forensic Unit; Police Lieutenant Colonel Narciso Abapo; Police Lieutenant Colonel Eunil Avergonzado; Police Lieutenant Colonel John Kareen Escober sa Consolacion Municipal Police Station; Police Major Rannel Gadiano; ug Police Captain Blesyl May Gadiano tungod sa ilang gitunol nga suporta sa imbestigasyon.
Gitataw usab ni Abad nga sa pagsulod sa "BER" months, mas gipahugtan sa PRO 7 ang siguridad ug police visibility sa tibuok rehiyon aron masiguro ang kaluwasan sa katawhan gikan sa mga kriminal taliwala sa nagkadaghang kalihukan alang sa holiday season. / AYB
