Nagpadayon ang kapulisan uban sa mga personnel sa Anti Mendicancy Board sa Dakbayan sa Sugbo sa pag-rescue sa mga bata nga mosaka sa publikong mga sakyanan aron manghatag og sobre o magpakilimos sa mga pasahero.
Giangkon ni P/Lt. Col. Janette Rafter, deputy city director for administration sa Cebu City Police Office (CCPO), nga migara na usab ning mga bata nga libud-suroy nga mamiktima sa mga tawo panahon sa kagabhion.
Duna siyay nakita sa social media nga dunay mga batang libud-suroy ningsulod sa usa ka tindahan ug nang-harass sa mga kustomer.
Tungod niini, ilang hingusgan ang pag-rescue sa maong mga bata uban sa City Social Welfare and Services sa Kagamhanan sa Dakbayan sa Sugbo.
Dugang ni Rafter nga dugangan nila og personnel ang gi-augment sa buhatan sa Anti-Mendicancy Board sa Kagamhanan sa Dakbayan sa Sugbo aron kon duna silay ilusad nga rescue operation, naa na dayon ang polis nga mouban kanila.
Una na nga niawhag si Konsehal Jose Abelllanosa, pinaagi sa iyang resolusyon sa Konseho sa dakbayan, ngadto sa DSWS ug Anti Mendicancy Board, paghipos sa maong mga bata kay basin gigamit na sa sindikato.
Gibutyag hinuon sa kapulisan nga wala sila nakamonitor nga dunay nagpaluyo nga sindikato sa maong mga bata. / AYB