Gipalig-on pa sa Cebu City Police Office (CCPO) ang ilang pagpahugot sa seguridad sa Dakbayan sa Sugbo pinaagi sa pakigtambayayong sa nagkalainlaing hugpong sa katilingban.
Subay niini, nakigtagbo ang kadagkuan sa kapulisan sa Dakbayan sa Sugbo sa mga driver sa ride hailing app sama sa Grab ug Move It.
Ang pagpalig-on sa partnership sa maong ride hailing app nagtumong nga mapahimuslan ang lapad nga impormasyon sa maong mga service providers alang sa pagpugong ug pagsulbad sa usa ka krimen, intelligence sharing, ug pagpa-alerto sa komunidad sa tibuok Dakbayan sa Sugbo.
Niadtong Biyernes sa hapon, Hulyo 18, 2025, gitapok ang dul-an usa ka gatus ka driver sa Grab ug Move It sa pagpangulo sa hepe sa CCPO nga si Police Colonel Enrico Figueroa alang sa gihimong workshop sa Grab Pioneer Building sa Cebu Business Park.
Mitambong usab sa maong kalihukan si Grab Public Affairs Manager Malou Inocando-Tabar nga usa sa misanong sa awhag sa kapulisan nga makigtambayayong alang sa kahusay ug kalinaw sa dakbayan.
Lakip sa mitambong silang Jose Rafael Lipardo, Grab Driver Engagement Lead; Gerard Hechanova, Move It Driver Engagement Specialist; ug si Jose Mari Orlanda, Grab Driver Engagement Specialist.
Giila ang kapasidad sa maong mga driver sa ride hailing app nga mohatag og impormasyon sa kapulisan sanglit sila ang naa kanunay sa karsada.
Giedukar sila ni Police Lieutenant Fredilson Montero Codilla, ang deputy station commander sa Sawang Calero Police Station 6 ug Police Captain Irwin Sanchez Jr., ang deputy chief sa City Intelligence Unit sa CCPO kun unsaon sa pag-ila sa mga kriminal ug unsay buhaton kung sila nakasaksi sa usa ka krimen.
"Together, we can build a safer, more resilient Cebu City...We urge all ride-hailing and delivery drivers to remain vigilant and to report suspicious activities immediately. Your partnership is vital in our fight against crime," matod ni Figueroa. / AYB