MOHATAG og hinabang pinansiyal ang Cebu Police Provincial Office (CPPO) sa pamilya sa polis nga nakabsan sa kinabuhi human ni mapusilan sa usa ka lalaki nga nangilog og armas niadtong Biyernes sa udto, Hunyo 27, 2025, sa may dalan P. Del Pilar, Barangay Poblacion, Siyudad sa Danao.
Matod ni Police Colonel Jovito Atanacio, ang hepe sa CPPO, nga sa pagkakaron napahimutang na ang haya ni Police Patrolman Mark Gomer Ornopia sa ilang panimalay sa Lungsod sa Tabogon ug duna na silay inisyal nga pakighinabi sa asawa niini.
Usa sa ilang gitinguha nga mahatagan og trabaho ang asawa sa mitaliwan nga polis aron makasustiner sa panginabuhian ilabi na nga duna silay usa ka anak nga masuso.
“Nanduon ang among suporta sa polis hangtod nga madala sa katapusan nga pahimutang ang among polis ug sama sa iyang nabilin nga asawa ang suporta nanduon nga ihatag namo,” matod ni Atanacio.
Karong adlawa, Martes Hulyo 1, 2025, si PNP Chief Police General Nicolas Torre III mobisita sa Central Visayas ug nagtuo si Atanacio nga usa sa bisitahon sa ilang labaw mao ang haya ni Ornopia.
Dugang ni Atanacio nga sa pagkakaron, wala pa sa ilang hunahuna ang pagrelibo sa hepe sa Siyudad sa Danao tungod sa nahitabo sa iyang sakop.
Ang ilang giuna mao ang pagpahimutang sa patay nga lawas ni Ornopia ug ang pagtabang sa pamilya niini.
Nasubo sila sa gidangatan sa ilang sakop nga nagtinarong sa pagtrabaho apan nabiktima sa usa ka kriminal nga nangilog og armas sa guwardya sa usa ka pawnshop sa maong dapit.
Ang nahitabo kang Patrolman Ornopia pasabot ni Colonel Atanacio usa ka pagtulon-an sa tanang polis.
Tambag niya sa matag police personnel nga mag-ampo sa dili pa moadto sa trabaho aron mapanalipdan sa labaw nga makagagahum. / AYB