Gihulagway sa Cebu City Police Office (CCPO) nga malinawon ug hapsay ang Sinulog sa Dakbayan ug Sinulog sa Lalawigan niadtong Sabado, Enero 13, ug Dominggo, Enero 14, 2024, sa Cebu City Sports Center (CCSC).
Si Police Lt. Col. Janette Rafter, deputy city director for operations sa CCPO, ang duha ka mga dagkong kalihukan gibantayan sa kapin sa usa ka libo ka security personnel.
Way natala ang kapulisan nga krimen sa sulod sa CCSC, lakip na sa rota sa Sinulog, gikan sa pagsugod hangtod nga natapos sa lawom na nga gabii.
“Malipayon ta nga wala gyud tay nataho nga krimen,” matod ni Rafter.
Gibana-bana ni Rafter nga kapin sa 15,000 ka mga tawo ang ningsaksi sa sulod sa CCSC, wala pay labot ang liboan usab ka mga tawo sa gawas nga nag-atang sa pag-agi sa contingents.
Usa sa nabantayan ni Rafter nga ilaha unya nga korehian mao ang mga photographer nga angay nga ipahimutang aron dili makabalda sa sayaw sa contingents.
Nakasabot si Rafter nga dunay indigay sa pagkuha og
hulagway apan kinahanglan sila nga ipahimutang aron dili magkayamukat.
“Naay part sa ilang sayaw nga mokalit sila’g dagan, nya manga-hamper sila..” dugang ni Rafter.
Nagpasalamat ang CCPO sa publiko nga nisunod sa ilang panawagan nga dili magdala’g mahalong butang aron dili mabiktima sa mga dautang elemento.