CCPO nangandam sa seguridad sa Palaro 2024

CCPO nangandam sa seguridad sa Palaro 2024
File photo

Human sa malampuson nga paghatag sa seguridad sa Central Visayas Regional Athletic Association (CVIRAA) nga natapos niad­tong Mayo 9, 2024, ang ka­pulisan sa dakbayan sa Sugbo andam na sa nag­singabot nga Palarong Pam­bansa sa Hul­yo 2024.

Matod ni Police Colonel Ireneo Dalogdog, hepe sa Cebu City Police Office (CCPO), wala sila makatala og krimen sa CVIRAA.

Kini nagpasabot lang nga epektibo ang ilang gihimo sa maong dakong kalihukan sa Central Visayas.

Apan dako kini nga hagit kanila ilabi na nga liboan ka mga atleta ug mga delegado sa lain-laing rehiyon sa tibuok Pilipinas ang ilang bantayan sa Palarong Pambansa.

Atol sa CVIRAA, kapin sa duha ka gatus ka nga police personnel ang gipakatap sa events sa paugnat-sa-kusog ug atol sa Palaro 2024, mahimong triplehon na ang gidaghanon sa mga polis nga idestino.

Niadtong Biyernes, Mayo 10, 2024, gipabalik na sa ilang units ang kapin sa 200 ka mga polis nga gipabantay sa CVIRAA.

Nagpasalamat ang director sa CCPO sa mga polis nga miserbisyo sa maong dakong kalihukan ug magsugod na usab sila sa pagpangandam sa labing dako nga sports event sa nasod, ang Palarong Pambansa 2024. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph