Apil nga nangandam ang kapulisan sa dakbayan sa Sugbo sa ilusad nga transport strike karong adlawa, Nobiyembre 22, 2023 sa Pagkakaisa ng mga Samahan ng Tsuper at Operator Nationwide (Piston) Cebu Chapter.
Sugdan ang paghunong sa pagpamasada sa ilang mga miyembro sa alas 5 sa kaadlawon.
Si Police Lt. Colonel Janette Rafter, deputy city director for operations sa Cebu City Police Office (CCPO), nagkanayon nga nag meeting na ang mga opisyal sa Cebu City Transportation Office ug kapulisan kon unsay ilang buhaton.
Moabag ang mga polis sa traffic enforcers nga gipakatap sa kadalanan aron mahapsay ang dagan sa trapiko ug dili magubot ang mga manakayayay.
“Kon unsa man ang maserbisyo namo, matabang, mahatagan og comfort ang mga manakayay in case madayon ang strike mohatag gyud mi sa among mahimo,” matod ni Rafter.
Kon gikinahanglan nga gamiton ang ilang patrol cars aron masakyan, ila kining buhaton aron dili matanggong sa karsada ang publiko.
