NAGSUGOD na sa ilang programa ang kapulisan sa Dakbayan sa Sugbo alang sa pagpaubos sa ilang mga timbang ug makuha ang 34 nga sukod sa hawak sa matag police personnel.
Kini subay sa kamanduan ni Police General Nicolas Torre III ang pangulo sa Philippine National Police nga kinahanglan nga ang tanang polis sa nasod physically fit.
Ang mapakyas pagtuman niini mamahimong mataktak sa serbisyo base sa balaod, matod ni Torre.
Matod ni Police Lieutenant Colonel Maria Theresa Macatangay deputy city director for operation sa Cebu City Police Office (CCPO) nga mohimo sila og weight loss and management program sa pagpangulo sa hepe niini nga si Police Colonel Enrico Figueroa.
“Simply lang we are collecting the Body Mass Index of our PNP personnel as well as their weight at this current time and then for certain period in a monthly basis atoa na gina-monitor ang pagkunhod sa ilang weight and dapat aligned sila sa ilahang body index,” matod ni Macatangay.
Gawas sa maong programa, duna sab silay gihimo nga sports activities nga salmotan sa mga polis sama sa basketball tournament nga gisugdan na sa milabay nga adlaw.
Pasabot ni Macatangay nga ilang tugotan ang ubang mga personnel kon unsa nga paagi sila nga mapakunhod sa timbang ug mopagamay sa ilang mga hawak apan kinahanglan nga buhaton nila kini pagkahuman sa ilang duty.
Gidasig nila ang mga polis nga mo-enroll sa mga gym ug ubang matang sa exercise sama sa calisthenics ug running nga makatabang nga mahimo silang physically fit.
Makatabang sab kanila ang matag adlaw nga foot patrolling sanglit mosunog kini sa tambok diha sa lawas ug makahatag pa sila og seguridad sa mga tawo nga naa sa karsada. / AYB