SAYO pa lang sa buntag gipakatap na sa Cebu City Police Office (CCPO) ang ilang mga personnel sa mga publikong tunghaan sa Siyudad sa Sugbo subay sa gipatuman nga hugot nga seguridad atol sa unang adlaw sa pagbukas sa klase sa Lunes, Hunyo 16, 2025.
Matod ni Police Lieutenant Colonel Maria Theresa Macatangay, deputy city director for operation sa CCPO, nga gikan sa buntag hangtod sa udto wala sila makadawat og report nga dunay nabiktima sa krimen.
Ang matag police station gitahasan ni Police Colonel Enrico Figueroa, ang hepe sa CCPO, nga mobantay sa gawas sa tunghaan tungod sa pagdagsa sa mga estudyante uban sa ilang mga ginikanan.
"Walay mga problema nga atong nasugatan mahitungod sa peace and order, security and safety sa mga estudyante," matod ni Macatangay.
Dunay gipangbutang nga mga police assistance desk ang CCPO sa gawas sa tunghaan aron maoy moatubang sa mga reklamo o kabalaka sa mga ginikanan.
Gibutyag ni Macatangay nga huwaton sa mga polis nga makasulod na ang tanang estudyante una pa sila magsugod sa ilang beat patrolling ug mobalik na sab inig ka hapon atol sa tinggawas sa mga estudyante. / AYB, Hulagway gikan ni Juan Carlo de Vela