GIHANGOP sa Cebu City Police Office (CCPO) ang kamanduan ni PNP Chief Police General Nicolas Torre III nga iyang pahulipan og sundang ang armas sa iyang mga sakop kon butalo kini sa paggamit sa ilang mga armas.
Una nang nibutyag si Torre nga iyang estriktong ipatuman ubos sa iyang pamunoan ang firearms proficiency policy.
Iyang gibutyag nga gani siya andam mopaubos sa firearms proficiency test ug kon dili siya makapasar, moretiro na lang siya sa iyang pagkapolis.
Kini nga palisiya gihangop sa kapulisan sa Dakbayan sa Sugbo kay alang kang Police Lieutenant Colonel Maria Theresa Macatangay, deputy city director for operation sa CCPO, nga kinahanglan nga ang usa ka polis bansay sa paggamit sa iyang armas.
Apan kampante si Macatangay sa kapulisan sa Dakbayan sa Sugbo tungod kay haniti na kini nga mogamit sa ilang mga armas.
"Sayod man ta nga ang kapulisan ngari sa Cebu City are really firearms proficient, kami andam nga mosubay sa mga programa sa atoang bag-o nga Chief PNP ug nalipay mi nga sa iyang tumong pag-ensure nga ang atoang kapulisan which is dapat lang man gyud proficient sa ilang mga armas," matod ni Macatangay.
Gibutyag sab ni Macatangay nga sa pagkakaron dunay programa nga gipatuman si CCPO Chief Police Colonel Enrico Figueroa nga mao ang eight keep bullet diin sa walo ka bala kinahanglan nga maigo niya ang ilang target sa walo ka higayon.
Nangandam na sab sila sa himuon nga gun proficiency test ug dako ang pagtuo ni Macatangay nga silang tanan makapasar sa standard nga gipatuman sa ilang bag-ong pangulo sa kapulisan.
Giangkon hinuon niya nga dakong hagit sa tanang polis sa Dakbayan sa Sugbo ang pagpraktis sa paggamit sa ilang armas tungod sa kamahal na sa presyo sa bala karon.
Apan bisan pa man niini, dili kini babag sa ilang pagbansay ug naandan na sa CCPO nga moapil sa mga shooting competition.
Niabag sab kanila ang local nga kagamhanan sa Siyudad sa Sugbo diin naghatag kini og libre nga bala sa matag police personnel aron magamit sa ilang pagbansay-bansay. / AYB