PUBLIKO MAKAGAMIT: Human sa CVIRAA makapahimulos na unya ang publiko sa bag-ong girenovate nga swimming pool sa  Cebu City Sports Center.  / AMPER CAMPAÑA
PUBLIKO MAKAGAMIT: Human sa CVIRAA makapahimulos na unya ang publiko sa bag-ong girenovate nga swimming pool sa Cebu City Sports Center. / AMPER CAMPAÑA

CCSC swimming pool buksan sa publiko

Gipahibawo sa tigdumala sa Cebu City Sports Center (CCSC) nga mamahimo nang mogamit ang publiko sa ilang swimming pool human sa pagpahigayon sa Central Visayas Regional Athletic Association (CVIRAA) Meet karong Mayo 9.

Ang mga pasilidad sa CCSC sama sa swimming pool, track oval ug uban pa gisirad-an sa miaging tuig aron ayuhon.

Apan matod ni John Pages, ang chairman sa CCSC, nga ilang gipasakaan ang ilang entrance fee alang sa maintenance sa swimming pool ug uban’g mga pasilidad apan wala pa matino kon tagpila.

Matod niya nga ila pang tuki-on ang maong usbaw sa management apan iyang gisiguro nga dili kaayo kini dako ug makaya ra sa bulsa ang usbaw, apil na ang entrance fee sa track oval nga gikatakdang ablehan sa sunod bulan.

Apan iyang giklaro nga ang track oval magamit lang sa publiko human sa Palaro nga ipahigayon sa siyudad sa Sugbo karong Hulyo 6 hangtod Hulyo 17.

Gitataw sa opisyal nga angay lang nga usbawan ang entrance fee tungod sa daku’ng kantidad nga nagasto sa pagpaayo sa CCSC.

Matod ni Pages nga moabot sa P25 milyunes ang nagasto sa pagpaayo sa swimming pool ug wala makagasto niini ang gobyerno sanglit ang kwarta nga gigamit gi-donate man sa pribadong sektor.

Bahin sa kinatibuk-ang pundo nga gigahin alang sa pagpaayo sa tibuok CCSC, si Pages nagkanayon nga wala siyay eksaktong kantidad kon pila tanan ang nagasto kay dili lang usa ka tawo ang mihatag og donasyon apan daghan.

Sa pagka karon, P50 ang entrance fee sa swimming pool alang sa mga regular users, P30 sa estudyante, senior citizens ug persons with disabilities.

Apan mas taas og P10 ang entrance alang niadtong maligo sa gabii.

Ang track oval adunay entrance nga P20 alang sa regular users, P15 alang sa mga estudyante, senior citizens, ug PWDs sa adlaw. Apan mosaka kini og P5 alang niadtong mag-jogging sa gabii.

Ang aerobics ug Zumba adunay bayranan nga P15 matag sesyon.

Ang badminton court mahimong abangan og P200 matag oras, samtang ang abang sa table tennis ug volleyball court tag P170 matag oras.

Sa parking, P30 ang bayad sa mga sakyanan, samtang P20 sa motorsiklo.

Atol sa blessing sa swimming pool sa Huwebes, Mayo 2, ang Cebu City Niños swimming team maoy unang mipahimulos niini. / KJF, TPT

Related Stories

No stories found.
SunStar Publishing Inc.
www.sunstar.com.ph