Hugot nga gihimakak sa Executives sa Cebu-based business process outsourcing firm nga gipasanginlan nga nalambigit sa scam o pagpangilad nga moabot sa $44 million ang ilang nakawkaw nga maoy giduso sa U.S Department of Justice (DOJ).
Ilang gibutyag nga ang kompanya lehitimo nga nag-operate nga dunay actual value sa transaction nga moabot lang sa kantidad nga $2 milyunes.
Lakip na niini ang $1.6 milyon nga nahatag na nila ug ang $140,000 nga na-refund.
Atol sa press conference niadtong Lunes, Mayo 4, 2025, ang Innocentrix’s CEO nga si Mike Sodilla ug ang Vice President nga si Bryan Tarosa nga pulos napriso sa America nangangkon nga inosente sila pinaagi sa ilang spokesperson nga si Attorney Oliver Baclay.
Matod ni Baclay nga ang Innocentrix wala malambigit sa bisan unsa nga pagpangilad ug misalikway sa pasangil nga ang kompanya nag-target sa mga tiguwang.
Siya nibutyag nga samtang ang maong publishing industry nagdani sa mga hamtong nga mga individual gihangop sab nila ang mga batan-on.
Mahitungod sa pasangil nga $44 million, nadismaya si Baclay sanglit walay ebidensya nga gipakita nga makamatuod sa pasangil, kapin usa ka buwan na silang nagpaabot.
Giklaro ni Baclay nga ang actual transaction moabot lang sa $2 million apil na niini ang $1.6 million nga nahatag na ang serbisyo ug $140,000 nga refund.
Iyang gitataw nga ang Innocentrix aktibo sa pagtubag sa customer complaints pinaagi sa ilang customer service hotline sa kompanya ug nagpakita sa rekord sa bangko nga nihatag sila og refund.
Iyang gihimug-atan nga ang Innocentrix nagtinguha pag-refund sa ilang mga customer , nisukwahi sa pasangil nga sila nangilad.
Gisalikway usab nila ang pasangil sa DOJ nga way ebidensiyang mosuporta sa $44 million nga scam nga ang husay sa maong kaso gisibog ngadto sa Agusto ning tuiga.
Bisan sa pagkalangay, si Baclay masaligon nga malimpyo ang pangalan ni Sordilla ug Tarosa dungan sa panawagan sa mga sakop sa media ug ubang sector sa katilingban nga tabangan sila nga mabalik sa Pilipinas.
Sa dihang gipangutana kon unsa na ang sitwasyon sa Innocentrix matod ni Baclay nga sa pagkakaron wala na kini mag-operate.
Lakip sa giklaro ni Baclay ang unang nigawas nga report nga moabot sa 800 ka tawo ang nalambigit sa $44 million sanglit 9 lang ka authors ang nalambigit sa actual transactions nga mo-total ngadto sa $2 million.
Iyang gi-question kon unsay gibasehan sa DOJ sa 800 ka author nga nangangkon ug ang Innocentrix nihangyo sa dugang impormasyon apan wala sila makadawat og dugang detalye nga mosuporta sa maong pasangil.
Gisubli ni Baclay nga ang operation sa kompanya lehitimo nga dunay kontrata, grievance procedures ug refund process nga wala motakdo sa pagpangilad.
Si Attorney Mark Opada ang Innocentrix’s external councel nidugang nga bisan sa pagsira sa kompanya ang tanang empleyado nahatagan sa ilang benepisyo sama sa 13th-month pay ug separation pay.
Iyang gibutyag nga walay reklamo nga giduso ngadto sa Department of Labor and Employment sanglit ilang giseguro nga ang katungod sa mga empleyado ilang gitamod.
Giklaro ni Opada nga moabot ngadto sa 30-40 ka mga empleyado ang naapektohan sa pagsira sa kompanya silang tanan pulos nahatagan sa sakto nga bayad.
Iyang gipasabot nga samtang ang operation sa Innocentrix nahunong apan ang ilang uban nga operations ang nagpadayon nga wala mabalda.
Gawas sa Innocentrix si Sordilla ang founder ug CEO sa MSordilla Builders ug construction firm ug ang MCS Studio usa ka photography ug videography business.
Nalambigit sab sila og mga resort diin sila ang nanag-iya sa Serene Oasis Resort in Cebu ug si Sordilla sab ang chairman sa Hiyas ng Pilipinas usa ka national beauty pageant nga nakatutok sila sa ilang charitable causes.
Kahinumdoman nga niadtong Disyembre 2024, ang mga sakop sa Federal Bureau of Investigation sa America nidakop nilang Sordilla, Tarosa ug sa ilang U.S Based associate nga si Gemma Traya Austin sa usa ka tindahan subay sa pasangil sa $44 million book publishing scam.
Ang maong scam nag-target sa mga tiguwang didto sa America nga nag-agni kanila nga mobayad sa ilang serbisyo ug nagpatuo nga naa silay publication o film adaptation.
Silang Sordilla ug Tarosa nag-atubang og kasong conspiracy to commit mail ug wire fraud lakip na ang money laundering.
Kon mapamatud-ang sad-an, mamahimong mabilanggo sila sulod sa 20 ka tuig ug dako nga multa didto sa America. / AYB