Gideklarar sa Cebu City Disaster Risk Reduction and Management Council (CCDRRMC) ang state of calamity human sa pipila ka adlaw nga kusog nga uwan ug pagbaha, Dakbayan sa Sugbo, Hulyo 16, 2025.
Gihimo ang deklarasyon atol sa tigum uban ni Mayor Nestor Archival, nga nagtumong sa pagpadali sa proseso sa pagtugot sa dinalian nga paggamit sa pundo ug ekipo aron mapalig-on ang mga lakang sa pagkontrolar sa baha.
Kini agi og tubag sa dinalian nga panginahanglan sa siyudad aron pagpahapsay sa mga epekto sa kusog nga uwan, ilabi na sa mga operasyon sa paglimpyo ug pagpalawom sa mga agianan sa tubig sa kritikal nga mga dapit.
Ang pagpalawom ug paglimpyo mag-focus sa baba sa dagkong mga suba sa siyudad, matud ni Archival, diin ang pundo igahin sa pag-abang og mga ekipo.
Gipatin-aw niya nga kulang ang kagamitan sa kagamhanan sa siyudad busa kinahanglan ang pag-abang.
“This declaration is not just a response to recent flooding, but part of our proactive preparations from now until December, as we anticipate more weather disturbances in the coming months,” matud sa mayor.
Dugang pa niya nga sa gilauman sa mga eksperto nga adunay walo ngadto sa 10 ka bagyo nga mosulod sa nasud sa nahibilin nga tuig, busa kinahanglan nga madali ang pag-preparar.
Niadtong Miyerkules, Hulyo 16, 2025, atol sa kusog nga uwan, daghang dapit lakip na ang downtown area ang gibahaan nga hangtud sa tuhod ang gilawmon.
Ang resolusyon nagkinahanglan pa og deliberasyon ug pag-uyon gikan sa City Council sa usa ka special session sulod sa 24 oras sa dili pa kini mahimong epektibo.
Gimando ni Archival nga ang City Command Center mo-operate og 24/7, samtang nanawag sa aktibo nga linya sa komunikasyon sa radyo aron masiguro ang paspas nga tubag sa emerhensya.
Gihatagan usab niya og gibug-aton ang padayon nga paghatag og tabang sama sa pagkaon sa mga pamilya nga nawad-an og pinuy-anan tungod sa pagbaha.
Gikumpirmar sa CCDRRMC nga P61 milyon nga quick response funds ang magamit ug gipasaligan ang publiko nga maayo ang pagdumala sa siyudad niini nga mga pundo alang sa mga operasyon sa emerhensya.
Mahitungod sa klase, matud sa mayor nga ang in-person classes mahimong mobalik sa Lunes kung molambo na ang panahon.
“The moment makita nato sa Sunday, I’m going to consult with the Disaster (Council). Ang basehan sa pag-resume sa klase is coming from them. So if okay na, balik na ta sa klase, face-to- face,” matud ni Archival.
Iya usab nga gi-recall ang mga paningkamot sa nangaging administrasyon nga Gubat sa Baha nga nagsugod sa paglimpyo sa mga imprastraktura nga nagsubay sa easement zone sa suba sa downtown area aron maminusan ang epekto sa baha.
Matud ni Archival nga ipadayon niya ang operasyon aron mabawi ang mga easement zones.
Si Engineer Oscar Tabada, ang in-house meteorologist sa siyudad, nagtaho atol sa emergency meeting gilauman nga mokalma ang panahon sa Sabado ug Dominggo. /