Nipirma og kasabutan ang kagamhanan sa Dakbayan sa Sugbo tali sa C PASS INC. nga maoy mobutang og digital public payment system alang sa pagbayad, taxes, assessments, ug ubang obligasyon alang sa siyudad.
Ang pinirmahay gitambungan ni City Mayor Raymond Alvin Garcia ug C PASS CEO Jaeyoung Kim nga magtimaan sa unang opisyal nga pagpatuman sa cashless governance sa Dakbayan sa Sugbo.
Atol sa press conference niadtong Lunes, Abril 7, 2025, si Garcia nipasabot nga kini usa ka bag-o ug makatabang nga pamaagi sa sistema sa pinansyal sa siyudad.
Ang Memorandum of Agreement naumol human sa Memorandum of Understanding (MOU) nga gipirmahan niadtong 2021, human sa tulo ka tuig nga hiniusang research, system evaluations, ug policy coordination.
“We are looking at all of these possibilities in the future so that we will have a more advanced way of transacting here in the city using technology,” matod ni Garcia.
Natukod dinhi sa Sugbo isip Filipino ug Korean enterprise, ang C Pass Inc., pinaagi sa ilang mga subsidiaries nalambigit sa food ug construction sectors, ug nahimong aktibo dinhi sukad niadtong pagsugod sa pandemic.
Ang C-PASS maoy mohatag sa facility alang sa payment system ug madawat dayon sa siyudad ang bayad sa mga konsumidor sa samang oras.
Ang kagamhanan sa Dakbayan sa Sugbo maoy gitahasan nga mo-develop sa ilang kaugalingon nga platform, sama sa website o mobile application nga ang C-PASS maoy modawat sa bayad.
Parehas ang C-PASS ug ang gobiyerno nga responsablisa paghatag og gikinahanglang ekipo ug facilities alang sa system integration.
Natalid sa kasabutang nga ang duha ka partido maoy moabaga sa galastuhan sa ilang kaugalingong platform, nga mohaum sa ilang matag sistema.
Ang mga financial transactions maglakip sa Convenience Fee, nga bayaran sa mga konsumidor wa pay labot sa alang sa Dakbayan sa Sugbo.
Ang C-PASS maoy mokolikta sa Convenience Fee sa di pa i-remit ang Net Settlement Amount ngadto sa City Hall.
Molungtad og usa ka tuig ang kasabutan ug automatic nga mo- renew alang sa laing tuig depende kon way kausaban nga mahitabo. / JPS