Sugod sa alas 10:00 kagabii, Disyembre 15, nag-roving na ang mga polis sa dakbayan sa Sugbo aron ipatuman ang ordinansa sa curfew sa mga menor de edad nga naa pa sa kadalanan bisan sa lawom na nga kagabhion.
Ang curfew sa mga menor de edad hangtod sa alas 5 sa buntag apan kon mosimba kini sa Misa de Gallo uban sa ilang pamilya, dili kini dakpon.
Matod ni Police Lieutenant Colonel Janette Rafter, deputy city director for operations sa Cebu City Police Office (CCPO), nga ang tumong niini aron malikayan nga dunay mga batan-on nga naa pa sa karsada nga nag-inom ug nagpaabot sa oras sa Misa de Gallo.
Iyang gipasabot nga daghan ang mag-inom sa gawas ug kon mangahubog na moadto sa simbahan nga peligro nga mag abot sa laing grupo sa mga batan-on nga ilang kontra.
“Mao gyud na ang abutanan ugma ang simbahan. Gikan nag inom kining mga batan-on nga naglatagaw lang ba nya mo diretso sa simbahan so gamayng kisaw didto sa simbahan gamayng bikil, naa na dayoy insidente,” matod ni Rafter.
Niadtong Disyembre 22, 2022, usa ka lalaki nga gikan nitambong sa Misa de Gallo namatay human napagan sa pinusilay tali sa duha ka mga grupo sa mga batan-on sa Brgy. Parian.
Si Anthony Bolocon Corro, 37, sa Bonifacio St., Barangay Tejero, Cebu City gideklarar nga patay mga tulo ka adlaw sa wa pa ang Pasko.
Dugang ni Rafter nga ang pagpatuman sa curfew alang lamang kini niadtong mga menor de edad nga walay igong rason nganong naa sila sa gawas sa lawom na nga gabii.
Kadtong mga batan-on nga kauban sa ilang pamilya, namalit og tambal ug kadtong mopaingon sa simbahan dili sila mamahimong dakpon.
Sa inventory sa CCPO, moabot ngadto sa 34 ka mga simbahan ang naa sa siyudad, 22 niini gihulagway nga dagkong parokya nga gipaabot nga maoy dugokon sa mga Katoliko.
Tungod niini, matod ni Rafter, magbutang sila og daghang mga polis sa maong mga simbahan, wala pay labot niini ang force multipliers ug Task Force Kasaligan gikan sa Kagamhanan sa Dakbayan sa Sugbo.
Gawas sa mga polis nga nagbantay sa simbahan, dunay gitahasan nga mga personnel nga mo-duty sud sa 24 oras.
Dunay gi-augment ang Police Regional Office 7 nga mga police personnel ngadto sa kapulisan sa dakbayan sa Sugbo nga mobot sa 60 nga mao usab ang ipakatap sa mga simbahan.