Dili mominos 100 ka transition housing units ang idonar ngadto sa dakbayan sa Sugbo gikan sa pribadong grupo aron pagtuman sa balaod bahin sa Balanced Housing Development Act alang sa socialized housing development.
Atol sa regular session sa Konseho sa Dakbayan niadtong Miyerkules, Oktubre 16, 2024, ang Konseho nakahukom sa pagtugot kang Cebu City Mayor Raymond Alvin Garcia sa pagpirma og kasabutan uban sa SM Development Corporation (SMDC) ug Cebu Chamber of Commerce and Industry (CCCI).
Sa memorandum of agreement nga gilakip sa resolusyon nga gipasiugdahan ni Konsehal Joel Garganera, dawaton sa dakbayan sa Sugbo ang transitional housing units nga gidonar sa SMDC ug CCCI.
Matod pa, ang Siyudad maoy mohatag sa lote kon asa ibutang ang mga unit.
Gidugang niini nga ang Siyudad mao ang magmintinar ug magdumala sa mga unit pinaagi sa pagpatuman sa mga lagda ug regulasyon, ug mga ordinansa.
Samtang, ang SMDC maoy nag-finance sa maong proyekto ug miuyon sa CCCI sa pagdesinyo, pagtukod, pagpamalit, pag-instalar, pag-monitor sa proyekto nga tukoron sa lote nga gihatag sa City Government.
Kon mahuman na ang proyekto sa pagpamalit og 100 ka units, himuon ang pagtugyan aron ipakita ang pagpanag-iya ug katungod sa yuta nga iya sa Siyudad.
Sa plano sa salog nga gilakip sa resolusyon, ang transitional housing units adunay usa ka cube-like three-floor design building nga adunay 34 ka kwarto sa usa ka andana.
Ang usa ka single room aduna nay kusina ug kasilyas nga adunay shower room.
Sa miaging SunStar report, ang City Government nipresentar niadtong Agusto 19, 2024 og usa ka modelo sa 15-square meter transitional housing nga naglakip sa duha ka lawak nga dunay double-deck beds, comfort room, mini sink, ug solar panels.
Gi-target kaniadto sa City Government nga mopahigayon og bidding alang sa transitional housing sa Septiyembre ning tuiga, matod ni Garcia.
Gikonsiderar usab niini ang duha ka kapilian alang sa lokasyon sa transitional housing nga naa sa South Road Properties (SRP).
Kini nga proyekto nagtumong sa paghatag og mga balay alang sa mga bakwit nga pamilya nga naapektuhan sa clearing operations aron mabawi ang tulo ka metros nga easement sa mga dagkong agianan sa tubig sa siyudad nga wala hingpit makatuman tungod sa kakuwang sa relokasyon.
Si Garcia gikatahong niingon nga aduna nay budget ang siyudad alang sa transitional housing nga giaprobahan sa Konseho sa kantidad nga P600 milyunes.
Matod niya, duha ka opsyon ang ilang gikonsiderar karon kalabot sa pagbutang og temporaryong kapuy-an sulod sa siyudad. Ang unang option adto sa SRP, ug ang ikaduha adto sa Block-27 sa North Reclamation Area.
Una nang gipasabot ni Garcia nga ang transitional housing, sa termino mismo, temporaryo lang sanglit ang City Government nagtukod man og permanenteng balay sa porma sa mid-rise buildings (MRB).
Dugang pa ni Garcia nga gikan sa transitional houses, ang mga okupante mahimong “makagradwar” sa permanenteng balay sama sa MRB. / JPS