Giangkon ni Cebu Classic coach Mike Reyes nga wala masuweldohi sulod sa duha ka mga buwan ang kadaghanan sa iyang mga magduduwa lakip na siya niini hinungdan nga wala na kini ganahi manuwa sa Maharlika Pilipinas Basketball League (MPBL).
Sa labing ulahing duwa sa Classic, aduna ra kini unom ka mga magduduwa nga ningkombati hinungdan nga nakatilaw kini og taga liog ug makahubog nga kapildihan batok sa Batangas City Tanduay Rhum Masters, 65-131, niadtong Hunyo 12, 2025.
Ang Classic kasamtangang naggunit og 4-11 nga rekord.
Sa pagpakighinabi ning mantalaan, nagkanayon si Reyes nga wala na siya naggunit sa Classic ning duwaa gumikan kay sa niaging semana pa siya nibiya sa team.
“Umuwi ako ng Cebu last week. Totoo yun, dalawang buwan na kaming hindi nakatanggap ng suweldo,” matod ni Reyes, kinsa igsuon ni TNT Tropang 5G coach Chot Reyes.
Hinuon gipasabot ni Reyes, kinsa nagbase na karon sa Dakbayan sa Sugbo, nga natagaan na siya og tunga sa buwan nga suweldo ug ang ubang mga magduduwa.
“Nakatanggap na ako ng half month at saka yung ibang players. May iba na one month ang natanggap. Sa pagkakaalam ko, dalawang players lang ang nabigyan ng two months na suweldo,” dugang ni Reyes, kinsa kanhi coach sa Southwestern University (SWU)-Phinma Cobras sa Cebu Schools Athletic Foundation Inc. (CESAFI).
Dihang gipangutana kon hingpit na ba siyang mobiya sa Classic, nagkanayon si Reyes nga dili pa siya makabuhi og pinal nga desisyon ning puntoha.
Gipasabot ni Reyes nga padayon pa ang ilang komunikasyon sa tag-iya sa team nga si Voltaire Ora, kanhi team manager sa Valenzuela Classic.
“Ang sabi ko na pag na-settle ang one month and a half salary ko, then we will negotiate,” matod ni Reyes.
Apan gitino ni Reyes nga sa pagsugod pa lang, aduna na siya’y namatikdan nga dili maayo kabahin sa pagdumala sa team ug usa kini sa mga rason nga nakadesisyon siyang mobiya.
Sa wala pa nagsugod ang kasamtangang season sa MPBL, ang Classic, basi sa tahi sa Spin.ph, gikonsiderar nga usa sa mga title contender tungod sa puwersa niini nga gipangulohan sa kanhi PBA players nga sila si Paolo Hubalde, Ken Holmqvist ug Rashawn McCarthy.
Naa sab sa teams sila si Jann Niccolo Jamon, Mark Meneses, Lean Martel, VJ Santos, Darrel Manliguez, Boom Boom Tampus, John Jabonete, Jeco Bancale, ug Dolan Adlawan,
Apan ang nangahisgutan gikataho nga pulos na namiya sa niaging buwan ug ang nangahabilin na lang mao sila si Ladis Lepalam, Dennis Santos, Gryann Mendoza, Brian Delos Santos, John Paul Martinez ug Jameson Hiro.
Nasayran nga ningsumbong na ang mga naagrabyadong mga magduduwa na sa Games and Amusements Board (GAB) apan wala pa kini nadawat nga tubag. / ESL